McGregor do ta fitojë duelin me Mayweather, ashtu sikurse fitoi përballjen me Jose Aldo. Ky është mendimi i ish-kampionit të botës në peshat e rënda në boks Tyson Fury, që ka folur sot në lidhje me përballjen e madhe të 26 gushtit. Fury beson se irlandezi do të befasojë botën me paraqitjen e tij në ring. Në dhjetor të 2015-ës, McGregor mundi Jose Aldo brenda 13 sekondave në UFC-194, duke i marrë titullin kampion bote, raporton telesport.
Një skenar që sipas Fury do të përsëritet edhe më 26 gusht. “Unë mendoj se McGregor do ta mundë me “KO” brenda 35 sekondash. Jam i bindur se Conor do t’i mjaftojë një raund për ta fituar atë përballje. Do të ishte diçka e mirë për boksin nëse McGregor do ta fitonte atë sfidë, një gjë e mirë edhe për njerëzit”, u shpreh sot Tyson Fury për “Daily Mail”. Boksieri britanik Fury pret për vetë të rikthehet në ring pas gati 18 muajsh pushim.
