Udhëheqësi i këshillit ushtarak të Sudanit ka hequr dorë nga udhëheqja e vendit një ditë pasi e udhëhoqi puçin që e rrëzoi presidentin Omar al-Bashir. Ky zhvillim erdhi pas protestave të vazhdueshme kundër tij.
Lajmin për tërheqjen e tij nga pushteti e bëri të ditur vetë ministri i mbrojtjes i vendit afrikan, Awad Ibn Auf, i cili dha deklaratë për televizionin shtetëror. Ai e emëroi si pasardhës të tij Gjeneralin Abdel Fattah Abdelrahman.
Protestuesit kanë refuzuar të largohen nga rrugët pasi po thonë se udhëheqësit e puçit janë njerëz shumë të afërt me ish-presidentin Bashir.
Ushtria ka deklaruar se do të qëndrojë në pushtet për dy vjetët e ardhshëm, ndërsa më pas do t’i organizojë zgjedhjet e lira.
Rënia e Bashirit nga pushteti erdhi pas protestave që zgjatën disa muaj. Ato filluan në dhjetor të vitit të kaluar për shkak të rritjes së çmimit të prodhimeve ushqimore.
Udhëheqësi i ri i këshillit ushtarak është gjithashtu një figurë e njohur e ushtrisë, por mediet raportojnë se e kaluara e tij është më e pastër se e gjeneralëve të tjerë sudanezë. Thuhet se ai është takuar me protestuesit për t’i dëgjuar qëndrimet e tyre, shkruan “BBC”.
