Më shumë se 2.000 vetë janë arrestuar që nga fillimi i vitit në Venezuelë për arsye politike dhe shumica prej tyre janë protestues kundër presidentit Nicolas Maduro, njoftoi sot organizata joqeveritare Foro Penal.
"Nga 1 janari deri në maj 2019, 2.014 njerëz u arrestuan dhe shumica prej tyre janë demonstrues," tha OJQ, duke shtuar se më shumë se 800 mbeten në paraburgim dhe mes tyre ka ushtarë.
Protestat kundër Maduro janë bërë gjithnjë e më të shpeshta që nga 23 janari. Kreu i opozitës Juan Guaido shpalli veten president të përkohshëm të Venezuelës, duke marrë mbështetje nga rreth 50 vende, përfshirë SHBA.
Lideri i opozitës bëri thirrje për një revoltë ushtarake javën e shkuar, e cila dështoi dhe në ndërkohë u mbajtën protesta gjatë së cilave kishte përleshje me policinë.
Prokuroria e Venezuelës njoftoi dje se 223 persona u arrestuan pas thirrjes së Guaido dhe se pesë vetë u vranë gjatë protestave të javës së kaluar.