Mjekët ngrenë alarmin për mpiksjen e gjakut tek pacientët me COVID-19

Bota

Mjekët ngrenë alarmin për mpiksjen e gjakut tek pacientët me COVID-19

Më: 24 prill 2020 Në ora: 17:36
Foto ilustrim

Në fund të muajit mars ndërsa koronavirusi vazhdonte të përhapej në qytetin e Nju Jork mjekët e spitalit "Mount Sinai" vunë re një fenomen të çuditshëm që po ndodhte me gjakun e pacientëve me COVID-19. Mjekë të specialiteteve të ndryshme vunë re shenja të trashjes dhe mpiksjes së gjakut në organe të ndryshme.

Në fund të muajit mars neurokirurgu J Mocco i spitalit “Mount Sinai” po mbante shënime rreth një simptome alarmante që po vinte re në shumë prej pacientëve të tij.

"Ndërsa kurba e pandemisë kishte nisur realisht të ngjitej në Nju Jork ne filluam të vërejmë, në të gjithë qytetin, një numër të madh goditjesh në tru dhe disa prej tyre ishin jashtëzakonisht shqetësuese”, thotë ai.

Përgjatë tre javëve duke nisur nga mesi i marsit, doktor Mocco vizitoi 32 pacientë që kishin pësuar goditje me bllokime të forta të gjakut në tru. Ky numër pacientësh përbënte dyfishin e numrit që ai ka trajtuar zakonisht në të njëjtën periudhë dhe të paktën gjysma e tyre ishin diagnostikuar me COVID-19.

Doktor Mocco i ndau gjetjet e tij me një tjetër mjek që kishte vënë re një fenomen të ngjashëm, pacientë me shenja të trashjes dhe mpiksjes së gjakut, por në mushkëri. Mjekët e spitalit “Mount Sinai” besojnë se kjo është një tjetër mënyrë se si koronavirusi mund ta shkatërrojë trupin e njeriut.

"Po vinim re shenja të mpiksjes së gjakut kudo, në vena, në këmbë, përtej asaj që ndeshet normalisht. Të gjithë ne besojmë dhe ka prova objektive, që kjo sëmundje rrit mundësinë empiksjes së gjakut", thotë ai.

Një fakt shqetësues për doktor Mocco-n është mosha e pacientëve. Nga 32 pacientë me goditje në tru që ai ka trajtuar që kur virusi nisi të përhapej gjerësisht, pesë ishin nën 49 vjeç dhe më i riu ndër ta 31. Ai thotë se në disa raste, goditja në tru ishte simptoma e parë që tregtonte se një pacient ishte infektuar nga COVID-19.

"Shumë gjëra nuk i kuptojmë lidhur me COVID-19, pra nëse mpiksja është një simptomë se diçka po shkon keq me enët e gjakut, apo nëse mpiksja është sipmtoma e parë e sëmundjes, por pa dyshim dimë që virusi po shkakton shumë prej problemeve që ne po vëmë re”, thotë ai.

Ky zbulim ka çuar në përdorimin e protokolleve të reja të trajtimit të të sëmurëve me COVID-19. Tashmë shumë pacientë po marrin doza të larta të një ilaçi për hollimin e gjakut edhe pa pasur ndonjë shenjë të mpiksjes së gjakut./VOA

commentFirst article
Sot mund të lexoni Shfletoni kopertinat