Si ta bindim Kinën që t'u përmbahet rregullave të sistemit liberal të ekonomisë botërore? Shtetet e Bashkuara nën Trumpin kanë zgjedhur sanksionet, ndalimet e investimeve dhe tarifat ndëshkuese për disa kompani kineze, duke detyruar "ndarjen" nga Kina, shkruan Deutsche Welle.
Azia po merr rrugën e kundërt, duke ulur tarifat brenda zonës më të madhe të tregtisë së lirë në botë - Partneriteti Ekonomik Rajonal Gjithëpërfshirës (RCEP), i cili përfshin 2.2 miliardë njerëz dhe gati 30 përqind të ekonomisë botërore. Kjo metodë premton shumë më shumë sukses në frenimin e Kinës.
Shtetet e Bashkuara duan të shtyjnë ditën kur Pekini do ta heq Uashingtonin nga froni i fuqisë më të madhe në botë. Qëndrimi i Trumpit mishëron konsensusin e elitës amerikane për të zgjatur epërsinë e tyre për aq kohë sa të jetë e mundur. Por ngritja e Kinës nuk mund të ndalet. Dyfishimi i performancës ekonomike të Kinës deri në vitin 2035, siç lë të kuptohet nga synimet e rritjes ekonomike të vendosura kohët e fundit, duket plotësisht realiste. Kështu, Kina do të kapërcente Shtetet e Bashkuara në fuqinë ekonomike.
Bashkëpunimi në vend të konfrontimit
Ndryshe nga Uashingtoni, fqinjët e Kinës kanë pranuar një zhvendosje të mundshme në krye të ekonomisë botërore. Në këto vende aziatike, të menduarit është afatgjatë, kështu që logjika e Luftës së Ftohtë nuk është opsion. Politikanët e tyre zgjodhën bashkëpunimin për të kontrolluar Kinën. Të udhëhequr nga kjo logjikë, kjo marrëveshje u nënshkrua gjithashtu nga aleatët amerikanë - Japonia, Koreja e Jugut, Australia dhe Zelanda e Re.
RCEP-i do t'u sjellë atyre fitim nga ekonomia kineze në rritje, dhe nuk do të duhet të bëhen vasalë kinezë në disa dekada. Koreja e Jugut dhe Japonia janë ato që kanë shumë përvojë në zhvillimin e marrëdhënieve ekonomike intensive me Kinën në të njëjtën kohë me distancën politike.
Ata pranojnë se Kina ka shpëtuar dy herë ekonominë botërore - së pari me programin gjigant të investimeve pas krizës financiare globale 2008/2009 dhe së dyti me një rimëkëmbje të shpejtë të rritjes pas pandemisë së koronavirusit. Këto vende janë të gatshme të ndikojnë që Kina të shkojë në drejtimin që u përshtatet atyre, në vend që ta izolojnë atë.
Azia si qendër e ekonomisë botërore
Kombet aziatike po tregojnë edhe një herë aftësinë e të menduarit largpamës dhe strategjik. Bazuar në rritjen e shpejtë të klasës së mesme, Azia do të nxisë ekonominë botërore në dekadat e ardhshme dhe do të bëhet një zonë e vetme tregtare me Kinën në qendër, si Evropa e sotme me Gjermaninë ose Amerika e Veriut me Shtetet e Bashkuara. Perëndimi duhet të pajtohet me këtë.
Ish-presidenti i SHBA-ve Barack Obama drejtoi SHBA-të gjatë mandatit të tij tetë-vjeçar drejt Azisë. Nënkryetari i tij i atëhershëm dhe presidenti i ardhshëm i SHBA-ve Joe Biden duhet të kthehet në atë kurs dhe të zgjedhë të bashkëpunojë me Kinën. Në një farë mënyre, fqinjët aziatikë të Kinës, duke nënshkruar RCEP-in, sinjalizuan gjithashtu dëshirën e tyre për të ndryshuar strategjinë e SHBA-ve. Kjo mund të vlerësohet si një fitore për Kinën - dhe gjithashtu mund të quhet realizëm politik, shkruan Deutsche Welle.
