Autoritetet palestineze kanë pranuar pagimin e të ardhurave të tyre nga taksat nga Izraeli pas rifillimit të marrëdhënieve të ndërprera nga plani i Izraelit për të aneksuar pjesë të Bregut Perëndimor dhe agjencia e Kombeve të Bashkuara për refugjatët palestinezë ka arritur të paguajë pagat e punonjësve të saj për nëntorin, por kriza nuk është zgjidhur.
Husein al-Shejh, një këshilltar i Presidentit Palestinez, Mahmoud Abbas, njoftoi në Twitter se rreth 3.8 miliardë sikla, ose 1.16 miliardë dollarë, ishin dërguar nga Izraeli.
Në maj, Abbas ndërpreu lidhjet me Shtetet e Bashkuara dhe Izraelin në përgjigje të planit të aneksimit të Izraelit, i cili më vonë u bllokua nga marrëveshjet për normalizimin e marrëdhënieve me Bahreinin dhe Emiratet e Bashkuara Arabe në Shtator, raporton aljazeera.
Autoriteti Palestinez refuzoi të merrte të ardhurat nga taksat nga Izraeli gjatë asaj periudhe. Pas zgjedhjeve të SHBA-së, palestinezët njoftuan se do të rivendosnin marrëdhëniet me Izraelin.
Autoriteti Palestinez, i themeluar pas Marrëveshjeve të Paqes në Oslo në vitin 1994, është përgjegjës në zonat nën kontrollin e tij për shërbimet themelore, të tilla, si furnizimi me energji elektrike dhe ujë, arsimi dhe mbledhja e mbeturinave. Ai gjithashtu lëshon dokumente të tilla si pasaportat, certifikatat e lindjes, certifikatat e vdekjes dhe patentat e shoferit.
Izraeli zakonisht transferon të ardhurat nga taksat dhe doganat tek Autoriteti Palestinez në baza mujore sepse, për shembull, ai kontrollon importin e mallrave në Bregun Perëndimor përmes portit të Ashdod.
