Vaksina kundër koronavirusit arrin në Arabinë Saudite

Bota

Vaksina kundër koronavirusit arrin në Arabinë Saudite

Më: 16 dhjetor 2020 Në ora: 13:12
Foto ilustrim

Vaksina kundër koronavirusit ka mbërritur në Arabinë Saudite, konfirmoi ministri i Shëndetësisë i këtij vendi, Tawfiq al-Rabiah.

Ai tha se dërgesat e para kanë arritur mëngjesin e së mërkurës, ndërsa shpërndarja e tyre do të nisë në tre ditët e ardhshme.

Al-Rabiah u bëri thirrje qytetarëve që të regjistrohen për marrjen e vaksinës.

Ai tha se vaksina do të jetë pa pagesë për të gjithë.

Ministri nuk e specifikoi se sa doza kanë arritur dhe as për cilën vaksinë bëhet fjalë.

Javën e kaluar, autoritetet shëndetësore saudite kanë miratuar vaksinën Pfizer/BioNTech për importim dhe përdorim.

Kjo vaksinë ka nisur tashmë të jepet në Mbretërinë e Bashkuar, Shtetet e Bashkuara dhe Kanada.

Pfizer/BioNTech është një bashkëpunim midis gjigantit farmaceutik amerikan, Pfizer, dhe kompanisë gjermane të bioteknologjisë, BioNTech, dhe ofron mbrojtje deri në 95%.

Aktualisht, janë në zhvillim e sipër ose janë zhvilluar edhe disa vaksina të tjera nga kompani si Moderna, apo Universiteti i Oxfordit.

Vaksinat e para, kudo në botë, është thënë se do t’i marrin punonjësit shëndetësorë dhe grupet e njerëzve më të rrezikuar - kryesisht të moshuarit./REL

commentFirst article
Sot mund të lexoni Shfletoni kopertinat