Çfarë ndodh pasi të keni marrë të dyja dozat e një vaksine kundër COVID-19? Zëri i Amerikës analizon ndryshimet në jetë para dhe pas imunizimit.
Edhe nëse jeni vaksinuar kundër COVID, kjo nuk nënkupton se mund të hiqni maskën dhe të shmangni distancimin fizik, thonë mjekët. Respektimi i masave të sigurisë duhet të vazhdojë.
“Punoj në një spital rehabilitimi, pra trajtoj pacientë që kanë pasur COVID por që janë në gjendje të dobët dhe ende në oksigjen. Ne vazhdojmë të përdorim maska, pra mbajmë maskën e tipit N95 kur është e nevojshme dhe respektojmë distancën fizike”, thotë Tamar Sivaslian, fizioterapiste.
Për mjekët ende nuk është e qartë nëse një person i vaksinuar mund ta shpërndajë ose jo virusin.
“Ka mundësi që trupi juaj ka ende virusin i cili nuk ju dëmton ju vetë, por shpëndahet nga kolla, tështitja ose kur flisni afër dikujt”, thotë mjekja Michele Heisler.
Prandaj mjekët kërkojnë nga të vaksinuarit të vazhdojnë respektimin e masave të sigurisë.
“Duhet të vazhdojmë të kërkojmë mbajtjen e maskës në komunitetin e gjerë. Nuk mund të kemi disa njerëz pa maska dhe disa të tjerë me maska. Mbajtja e maskës duhet të jetë normale për këtë kohë. Ne do t’ju njoftojmë kur mund ta hidhni maskën”, thotë William Schaffner, Profesor i Mjekësisë Parandaluese në Universitetin Vanderbilt.
Mjekët theksojnë po ashtu se një vaksinë e vetme nuk garanton se ju nuk do të infektoheni me variante të reja të koronavirusit.
“Ka prova se vaksinat që kemi janë të efektshme, por ka edhe shqetësime të reja se ndoshta nuk janë aq të efektshme kundër variantit të Afrikës së Jugut”, thotë Michel Heisler.
Shkencëtarët nuk kanë të dhëna për kohëzgjatjen e efektit të vaksinës. Megjithatë imunizimi mundëson heqjen e disa kufizimeve.
“Supozojmë se doni të takoheni me gjyshërit dhe familjarë tjerë. Nëse ata dhe ju janë vaksinuar, mund t’i takoni. Po nëse ata janë vaksinuar ndërsa ju jo? Them se po, mund të takoheni por me kujdes”, thotë William Schaffner.
Mjekët nuk mund të thonë me siguri se kur mund të kthehet normaliteti. Sipas tyre, për momentin është i rëndësishëm vaksinimi i sa më shumë njerëzve./VOA
