Organizata e Kombeve të Bashkuara njoftoi sot se të paktën 138 protestues paqësorë janë vrarë në Mianmar që nga grushti i shtetit ushtarak më 1 shkurt.
Zëdhënësi i OKB-së, Stephane Dujarric tha se kjo përfshinte 38 persona të vrarë të dielën, shumica në zonën Hlaing Thayer të Yangon, qyteti më i madh i Mianmar dhe 18 njerëz të vrarë të shtunën. Totali përfshin gra dhe fëmijë, sipas shifrave nga Zyra e OKB për të drejtat e njeriut.
“Sekretari i Përgjithshëm i OKB-së Antonio Guterres dënon me forcë dhunën e vazhdueshme kundër protestuesve paqësorë dhe shkeljen e vazhdueshme të të drejtave themelore të njeriut të njerëzve të Mianmarit,” tha Dujarric.
“Shefi i OKB-së përsëri i bën thirrje komunitetit ndërkombëtar, duke përfshirë vendet e rajonit, që të bashkohen së bashku në solidaritet me popullin e Mianmarit dhe aspiratat e tij demokratike”, shtoi ai.
E dërguara speciale e OKB-së, Christine Schraner Burgener lëshoi një deklaratë më parë duke dënuar gjakderdhjen, ndërsa ushtria sfidon thirrjet ndërkombëtare, përfshirë atë të Këshillit të Sigurimit, për përmbajtje, dialog dhe respekt të plotë për të drejtat e njeriut dhe lirinë themelore.
