Autoritetet në Nepal lusin alpinistët t’ua dorëzojnë bombolat e zbrazëta të oksigjenit – shpresojnë t’i rimbushin për t’i shpëtuar pacientët me COVID-19

Bota

Autoritetet në Nepal lusin alpinistët t’ua dorëzojnë bombolat e zbrazëta të oksigjenit – shpresojnë t’i rimbushin për t’i shpëtuar pacientët me COVID-19

Më: 10 maj 2021 Në ora: 23:07
Nepali

Nepali po e ndjen shumë mungesën e bombolave me oksigjen, sa që ka lutur alpinistët që ngjiten në Malin Everest që t’ua sjellin bombolat e zbrazëta me qëllim që të mos i lënë në mal, në kohën kur Nepali po lufton me valën e dytë të pandemisë së COVID-19.

Ky shtet ka dhënë leje për ngjitje më shumë se 700 alpinistëve në 16 rajone të ndryshme të Himalajeve, ku 408 prej tyre ia kanë mësyrë Malit Everest, me qëllim që të ringjallet turizmi në këtë vend.

Agjencia e Bjeshkatarisë së Nepalit u ka kërkuar alpinistëve që ta ndihmojnë Nepalin në luftimin e numrit të madh të rasteve të reja me COVID-19, që njëherit është duke e sjellë sistemin shëndetësor drejt kolapsit.

Kreu i kësaj agjencie ka thënë se alpinistët dhe ciceronët e tyre kanë marrë me vete 3.500 bombola me oksigjen, që kryesisht mbeten të groposura apo mbesin nëpër kodra derisa ata zbresin.

“I bëjmë apel alpinistëve që të kthejnë bombolat e zbrazëta, me qëllim që të mund t’i mbushim dhe t’i përdorim për shërimin e pacientëve të prekur me coronavirus”, thuhet në kumtesën e kësaj agjencie.

Shumë spitale private por edhe ato shtetërore në Katmandu, kanë bërë të ditur se nuk kanë kapacitete që të pranojnë pacientë tjerë – për shkak të mungesës së oksigjenit, por edhe të bombolave që mund t’i mbushin.

Sipas ekspertëve shëndetësorë, nevojiten afro 25 mijë bombola me qëllim që të shpëtohen jetë njerëzish.

commentFirst article
Sot mund të lexoni Shfletoni kopertinat