Mijëra njerëz u mblodhën jashtë ambasadës izraelite në Ankara dhe konsullatës së saj në Stamboll për të protestuar ndaj veprimeve izraelite kundër palestinezëve të hënën ndërsa presidenti Tayyip Erdogan foli me udhëheqësit e Lindjes së Mesme në lidhje me rritjen e dhunës.
Dhe sipas Reuters, pavarësisht nga një bllokim i plotë që synonte të frenonte rastet e coronavirusit, protestuesit në Stamboll, përfshirë sirianë dhe palestinezë, mbanin flamuj palestinezë ndërsa brohorisnin, “(ushtarët turq) në Gaza” dhe “Poshtë Izraeli, poshtë Amerika”.
Siç edhe është bërë e ditur deri më tani, Erdogan foli në telefon me Mbretin Abdullah të Jordanisë, Emirin Kuvajtian Sheik Nawaf al-Ahmad al-Sabah, si dhe presidentin palestinez Mahmoud Abbas dhe udhëheqësin e Hamasit, Ismail Haniyeh.
Ndërkohë ministri i Jashtëm turk Çavusoglu diskutoi çështjen me homologët e tij në Iran, Algjeri, Pakistan dhe Rusi.
Sipas një deklarate nga zyra e tij, Erdogan i tha Mbretit Abdullah se sulmet “çnjerëzore” kundër palestinezëve kishin për qëllim të gjithë myslimanët, duke shtuar se Turqia dhe Jordania kishin nevojë të punonin së bashku për t’i ndaluar ata.
Përleshjet e dhunshme mbi Jerusalemin u përshkallëzuan në mënyrë dramatike të hënën.
Zyrtarët shëndetësorë të Gazës kanë thënë se të paktën 20 njerëz, përfshirë nëntë fëmijë, u vranë nga sulmet ajrore izraelite të nisura pasi grupet militante palestineze hodhën raketa afër Jerusalemit.
