Një e dhënë tronditëse vjen nga Çekia, ku sipas Agjencisë së Statistikave, marsi i këtij vit ka rezultuar më vdekjeprurësi se çdo muaj tjetër që nga viti 1947.
Referuar të dhënave zyrtare, 16,000 vdekje u regjistruan në mars, konkretisht rreth 60 për qind më shumë se numrat mesatarë për atë muaj në periudhën 2015-2019.
Çekia u përball me valë të rëndë të koronavirusit në muajin mars, çfarë e detyroi Qeverinë që t’i ndalojë udhëtimet midis rajoneve për disa javë. Nga viktimat e raportuara për atë muaj, 5,779 ishin njerëz që u infektuan me koronavirus dhe vdiqën, kanë treguar më herët të dhënat e Ministrisë së Shëndetësisë.
Sipas Agjencisë së Statistikave, vdekshmëria ishte më e lartë midis burrave sesa grave. Javëve të fundit, situata pandemike është përmirësuar dukshëm në Republikën Çeke.
Mesatarja shtatëditore e infektimeve ka rënë në 95 raste për 100,000 banorë, shkruan Rel. Të hënën, Çekia ka nisur rihapjen e dyqaneve jothelbësore, pas gati gjashtë muajsh të mbyllura.
