Ministri amerikan i Mbrojtjes, Jim Mattis njoftoi sot përfundimin e pezullimit të manovrave ushtarake aleate në gadishullin Korean, i vendosur si një gjest i vullnetit të mirë pas takimit të presidentëve Donald Trump dhe Kim Jong Un.
”Siç jeni në dijeni, ne vendosëm për të pezulluar manovrat më të rëndësishme ushtarake si shenjë e vullnetit të mirë pas samitit të Singaporit në muajin qershor”, deklaroi Mattis gjatë një konference shtypi, ndërsa negociatat për denuklearizimin e Koresë së Veriut duket se janë ngadalësuar, shrkaun ATSH.
”Nuk kemi asnjë plan për pezullimin e manovrave të mëtejshme”, shtoi kreu i Pentagonit, ndërsa presidenti amerikan sapo anuloi një vizitë të planifikuar të kreut të diplomacisë, Mike Pompeo, në Phenian, duke cituar mungesën e progresit në lidhje me denuklearizimin.
Shefi i Pentagonit u shpreh i rezervuar në njoftimin e një date të saktë për rifillimin e manovrave ushtarake. Ai bëri të ditur se ushtarakët do të konsultohen me diplomatët amerikanë të ngarkuar për negociatat me Phenianin përpara marrjes së çdo vendimi.
