Peshkimi bëhet “mollë sherri” mes palëve në ngushticën e La Manshit

Bota

Peshkimi bëhet “mollë sherri” mes palëve në ngushticën e La Manshit

Më: 29 gusht 2018 Në ora: 10:28
Dy peshkarexha franceze e britanike

Dy peshkarexha franceze e britanike janë përplasur me njëra-tjetrën, duke hedhur ofendime, raketa dhe tymuese në një përplasje të pazakontë dhe të turpshme në ujërat e kanalit anglez, apo ngushticës së La Manshit, siç njihet ndryshe.

Përplasja ka ndodhur rreth 12 milje detare (22 km) nga brigjet e Normandisë, pranë gjirit të Senës.

Peshkarexhat britanike kanë të drejtë të ligjshme për të peshkuar në atë zonë, por, prania e tyre ka irrituar ato franceze, që kanë akuzuar britanikët se kanë pakësuar në mënyrë të paturpshme rezervat e peshqve.

Tashmë, peshkatarët britanikë kërkojnë mbrojtjen qeveritare, ndërsa francezët “vajtojnë” humbjen e një burimi parësor.

Rreth 40 anije franceze u mblodhën mesnatën e së hënës në shenjë proteste ndaj të ashtuquajturës “plaçkitje” britanike.

“Francezët kontaktuan britanikët dhe i penguan të punonin, duke u përplasur me njëri-tjetrin”, tha shefi i peshkimit në Normandi, Dimitri Rogoff. “Pati edhe hedhje gurësh, por asnjë nuk u plagos”.

Disa anije u dëmtuan gjatë përleshjeve, teksa në 3 prej tyre pati edhe vrima të shkaktuara, sipas pamjeve të shfaqura nga mediet franceze.

Britanikët nuk mund të ishin të barabartë në numër me “armatën” franceze. Me vetëm 5 anije kundrejt 35 franceze, ata u zmbrapsën. Dy prej anijeve britanike u kthyen në portin Birxham me xhama të thyera.

Ekuipazhet e tyre pretendojnë se u rrethuan, u qëlluan me gurë e copa metalike. Ndërkohë mediet franceze publikuan pamjet video të një anijeje skoceze që ishte përplasur me anije të tjera pranë saj.

commentFirst article
Sot mund të lexoni Shfletoni kopertinat