Ministri i Jashtëm i Iranit, Mohammad Javad Zarif, diskutoi mënyrat e lehtësimit të transaksioneve financiare ndërkombëtare gjatë një takimi me sekretarin e Jashtëm britanik, Jeremy Hunt, në Teheran, raportuan mediat iraniane.
Hunt arriti në Iran të hënën, më pak se dy javë pasi Shtetet e Bashkuara vendosën sanksione mbi sektorët kryesorë të ekonomisë së Iranit.
Agjencia iraniane e lajmeve IRNA tha se Hunt dhe Zarif diskutuan edhe mënyrat për t'i dhënë fund luftës në Jemen, ku Irani akuzohet për furnizimin me armë të rebelëve shiitë Huthi.
Teherani i mohon akuzat.
Ministria e Jashtme britanike nuk i komentoi ende bisedimet.
Gjatë vizitës, Hunt do të takojë edhe Ali Shamkhanin, sekretarin e Këshillit të Lartë Kombëtar të Sigurisë në Iran.
Hunt pritet të ngrejë rastin e punonjëses britaniko-iraniane të ndihmës, Nazanin Zaghari-Ratcliffe, e cila është burgosur në Iran qysh në prill të vitit 2016.
Zaghari-Ratcliffe, menaxhere projekti pranë Fondacionit Thomson Reuters, po shërben dënimin prej pesë vjetësh burgim, nën dyshimet se ka bërë komplot për të rrëzuar establishmentin fetar të Iranit.
Ajo dhe familja e saj i hedhin poshtë këto akuza.
Zyrtarët britanikë kanë kërkuar vazhdimisht lirimin e Zaghari-Ratcliffe në bisedimet me udhëheqësit iranianë.
