Princi Leka uron ditën e flamurit, tregon këmbanën e alarmit për reflektim patriotik shqiptar - Bota Sot
Princi Leka uron ditën e flamurit, tregon këmbanën e alarmit për reflektim patriotik shqiptar

Shqipëria

Princi Leka uron ditën e flamurit, tregon këmbanën e alarmit për reflektim patriotik shqiptar

Nga: A.Zh Më: 28 nëntor 2018 Në ora: 10:05
Princi Leka dhe Princesha Ella

Festën e Pavarësisë së Shqipërisë, e ka uruar edhe Princi Leka Zogu. Ai në një postim në Facebook, ka thënë se kjo ditë e shenjtë kombëtare, duhet jo vetëm të na gëzojë, por edhe të na bëjë të reflektojmë.

Ai ka theksuar se hemoragjia e një rinie që e kërkon të ardhmen jashtë atdheut, duhet të jetë një këmbanë e fortë alarmi për një reflektim të sinqertë dhe patriotik, përcjell Bota sot.

Princi Leka, ka deklaruar se familja Mbretërore do të jetë kurdoherë në shërbim të kombit shqiptar, pa kushte dhe me përkushtim të plotë.

“Rroftë Kombi Shqiptar! Rroftë Bashkimi Kombëtar!”, ka shkruar ai.

Postimi i plotë i Princit Leka:

Të dashur Motra dhe Vëllezër,

Qytetarë dhe qytetare të mbarë Shqipërisë, Kosovës, Maqedonisë, Preshevës, Malit të Zi e Çamërisë, Bashkatdhetarë kudo që ndodheni,

Gëzuar 28 Nëntorin, ditën e Pavarësisë së Shqipërisë, Flamurit tonë të zemrës, Atdheut tonë të dashur.

Në këtë ditë të shënuar të gjithë ndihemi krenarë dhe përkujtojmë luftrat dhe sakrificat e popullit tonë për të qënë i lirë dhe i pavarur, duke ruajtur krenarinë e shqiptarit në çdo situatë që ndodhemi, brenda e jashtë Atdheut.

Kjo ditë e shenjtë kombëtare duhet jo vetëm të na gëzojë, por edhe të na bëjë të reflektojmë! T’i shtrijmë dorën më të dobtëve dhe të margjinalizuarve, të mos pranojmë arrogancën, të punojmë për një shoqëri të hapur, tolerantë dhe solidare. Ne nuk mund të lejojmë që diferencat sociale dhe ekonomike të cënojnë dinjitetin e barabartë të qytetarëve dhe barazinë e tyre para ligjit.

Hemoragjia e një rinie që e kërkon të ardhmen jashtë atdheut, duhet të jetë një këmbanë e fortë alarmi për një reflektim të sinqertë dhe mbi të gjitha patriotik. 

Motra dhe vëllezër, ju bëjmë thirrje të mos shuajmë shpresën për ditë më të lumtura në këtë vend të begatë. Shqipëria meriton dashuri dhe besim, ua kemi borxh të parëve tanë, etërve të kombit!

Familja Mbretërore do të jetë kurdoherë në shërbim të kombit shqiptar, pa kushte, me përkushtim të plotë, me dashuri vëllazërore dhe me besim të pakompromis në Zot e në Atdhe.

Rroftë Kombi Shqiptar! Rroftë Bashkimi Kombëtar!"

Princ Leka

Image
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...