Kryetari i Komisionit për Informim, në Degën e LDK-së në Gjermani, Idriz Zeqiraj i është drejtuar me një letër publike kryetares së Komisionit Qendror të Zgjedhjeve, Valdete Dakës.
Në letrën publike të Zeqirajt, thuhet se “me keqardhje konstatojmë se Mërgata shqiptare, përkatësisht, grup-moshat, me të drejtë vote, vazhdojnë të diskriminohen dhe të provokohen, në mënyrën më të poshtër të mundshme nga KQZ”.
Zeqirajt ia ka numëruar kryetares së KQZ-së problemet me të cilat hasen mërgata shqiptare.
Letra e plotë:
VALDETE DAKA, kryetare
KOMISIONI QENDROR ZGJEDHOR (KQZ)
Prishtinë - Kosovë
E nderuara Kryetare,
Të nderuar anëtarë të KQZ,
Me keqardhje konstatojmë se Mërgata shqiptare, përkatësisht, grup-moshat, me të drejtë vote, vazhdojnë të diskriminohen dhe të provokohen, në mënyrën më të poshtër të mundshme nga KQZ.
1) Votimi me postë, i koklavitur, i komplikuar, me ngarkime e shkarkime kompjuterike, elektronike idioteske, i pakuptueshëm, për pjesën më të madhe të mërgimtarëve, i privon ata nga ushtrimi i së drejtës për votim;
2) Afati i shkurtër për aplikim, regjistrim, pranë KQZ, burokracia e shërbimit postar, pamundëson marrjen në konsidetarë, për votimin e mërgimtarëve;
3) Falsifikimi, i qëllimshëm, i datimeve marrëse në dorëzim të aplikacionit për votim, gjithashtu, pamundëson votimin;
4) Vota e mërgimtarëve nuk ka asnjë garancion, sigurim të mbrojtjes. Shembullojmë me konvertimet masive të votave të mërgimtarëve, në rastin e zgjedhjeve të fundit komunale, në Istog, kur votat e LDK-së, ishin konvertuar e faturuar partisë-bandë AAK-së. Dhe, megjithatë, denoncimet faktike i heshti KQZ, nuk i penalizoi kriminelët falsifikatorë e vjedhës të AAK-së, duke u bërë edhe KQZ pjesë e krimit;
5) E vërteta është se në Mërgatë jetojnë më shumë se gjysma e popullatës të Kosovës. Andaj, Mërgata, ndër vite, ka kërkuar organizimin e votimeve në shtetet ku jetojnë. Këtë e kanë zgjidhur shumë shtete tjera;
6) Nga komunikimet e bëra me mërgimtarët në shtetet evropiane dhe me ato tej oqeaneve: SHBA, Kanada, Australi e gjetkë, rezulton se as kësaj radhe Mërgata jonë nuk arriti, madje, as për se afërmi, të regjistrohen;
7) Prandaj, kërkojmë thjeshtëzimin e procedurës regjistruese dhe votuese, madje, të menjëhershme;
8) Kërkojmë shtyerjen e afatit regjistrues për votim, deri në datën 20 shtator 2019. Këtë duhet ta merrni shumë seriozisht;
9) Mos i prisni banditët pushtetarë aktual, të cilët, qëllimshëm, kanë vënë barriera, pikërisht, për të penguar dhe sabotuar votimin e Mërgatës shqiptare. Arsyen e dijmë të gjithë;
Përndryshe, edhe ju, anëtarë të Komisionit Qendror Zgjedhor, do të bëheni pjesë e krimit monstrum.
Lërini burokracitë e turpshme e kriminale në komunikim me Mërgatën!
Jipni përgjigje të menjëhershme në kërkesat tona legjitime.
Urojmë për mirëkuptim!
NË EMËR TË MËRGIMTARËVE,
kryetari i Komisionit për Informim,
në Degën e LDK-së, në Gjermani
Idriz Zeqiraj