Qeveria listoi viktima të Covid të vdekurit në aksident ose për shkaqe të tjera, mjekja shqiptare jep lajmin mbi korrigjimin e shifrave

Diaspora

Qeveria listoi viktima të Covid të vdekurit në aksident ose për shkaqe të tjera, mjekja shqiptare jep lajmin mbi korrigjimin e shifrave

Më: 7 gusht 2020 Në ora: 06:29
Anika Dolke

Mjekja Anika Dolke ka bërë publik një artikull interesant botuar sot mbi statistikat zyrtare të të vdekurve si pasojë e COVID-19, në Britaninë e Madhe.

Sipas artikullit të "Daily Mail’, deri tani qeveria britanike ka gabuar me të vdekurit si pasojë e COVID, duke regjistruar të paktën katër mijë viktima më tepër se shifra zyrtare.

Media londineze raporton se mijëra të vdekur të shpallur të vdekur nga koronavirusi, do të fshihen nga regjistri zyrtar i qeverisë, pas rishikimit të listave.

Në listat zyrtare të raportuara nga qeveria e Britanisë së Madhe doli se ishin përfshirë njerëz që ishin shëruar nga COVID, por kishin vdekur më pas për shkaqe të tjera.

Edhe pse kishin vdekur në rrethana të tjera, ata figuronin në listat e vdekjeve si pasojë e koronavirusit në Britaninë e Madhe.

Hetimi zyrtar

Shëndeti Publik Anglez ka gabuar me vdekjet si pasojë e koronavirusit, zbuloi një hetim zyrtar.

Numëroheshin deri tani si viktima edhe ata që mund të kenë vdekur nga ndonjë shkak tjetër disa muaj më vonë, pasi e kishin kaluar sëmundjen.

Mund të ketë deri në 4,000 persona të hequr nga numri i përgjithshëm i vdekjeve, ose 10 përqind e tyre, thotë raporti zyrtar.

Sekretari i Shëndetësisë Matt Hancock muajin e kaluar urdhëroi një rishikim urgjent se si llogaritet numri i vdekjeve në Angli për shkak të Covid, duke pretenduar se kishte gabime statistikore.

Akademikët zbuluan se metodat e Shëndetit Publik të Anglisë bënin që ministrat përgjegjës të llogaritnin viktima këdo që vdes, pasi ka rezultuar një herë pozitivisht për Covid-19. Madje ata llogariteshin të tillë, edhe nëse mund të kishin humbur jetën në aksident. Njëri prej tyre ishte goditur nga një autobus, dhe humbi jetën pak kohë pasi kaloi me sukses COVID. Por ai ishte regjistruar në të dhënat qeveritare të Britanisë së Madhe, si një prej viktimave të COVID-19.

Sipas llogaritjeve të deritanishme, teknikisht, askush nuk mund të shërohet kurrë nga virusi. Madje të gjithë, 265,000 pacientë të konfirmuar në Angli, do t’i kenë vdekjet e tyre të atribuara nga kjo sëmundje, nëse nuk do të bëhet korrigjimi në kohë.

Gabimi po korrigjohet, sepse 4,000 të vdekur janë hequr nga numri zyrtar i Anglisë që numëronte 41.749 viktima deri tani, sipas raportimit. Një nga ekspertët kryesorë që zbuloi gabimin i tha MailOnline se ‘supozimi më i mirë’ i tij ishte se më shumë se 1.000 njerëz të vdekur ishin regjistruar gabimisht te listat e Covid-19.

Shifrat e reja që përfshijnë edhe Skocinë dhe Irlandën Veriore, do t’i atribuojnë vdekjet vetëm nga Covid-19, nëse ndodhin brenda një muaji nga diagnostikimi i tyre.

Sekretari i Shëndetësisë pritet të njoftojë matjen e re deri në fund të javës, pas rishikimit dy-javor, të fiaskove të numërimit.

E meta statistikore u zbulua nga profesorët e Universitetit të Oksfordit Carl Heneghan dhe Dr Yoon Loke, si dhe nga Universiteti i Anglisë Lindore.

Profesori Heneghan, drejtor i Qendrës për Mjekësi në universitetin prestigjoz, i tha "the Sun", se ky vendim "ishtë i arsyeshëm. Nuk ka asnjë kuptim që qeveria t’i atribuojë vdekjet nga Covid, 28 ditë pas infektimit të tyre", theksoi ai. Edhe vendet e tjera raportojnë pasaktësi dhe ngrenë dyshime të mëdha me shifrat.

Shfaq komentet
comments powered by Disqus
Sot mund të lexoni Shfletoni kopertinat