Kështu u konstatua në takimin e punës i cili u mbajt dje në Nagold afër Shtutgartit, në restaurantin e bukur me pronar, Hysni Gashaj, ku morën pjesë z. Agim Polloshka, aktivist i dalluar i çështjes kombëtare, z. Hafiz Gagica, ich kryetar i LDK-së në Gjermani dhe i Kolegjiumit të degëve të saj në botë, drejtori i firmës gjermane për energji në Passau, z. Petz, Dr. Ass. Nikollë Shabani, kryetar i Asociacionit të Intelektualëve shqiptarë, si dhe z. Skënderbeg Klaiqi, kryetar i Lobit Shqiptar në Botë, aktivist dhe inovator në fushën e energjisë alternative, etj.
Në takim u shqyrtuan mundësitë dhe potenciali shumë i madh që e ka Mërgata jonë në Gjermani dhe botën perëndimore, të cilin ajo mund t’ia ofrojë atdheut tonë të dashur, Kosovës martire, e cila 20 vite pas çlirimit ende rënkon nga varret dhe plagët e luftës, vuan nga varfëria, papunësia, mos zhvillimi ekonomik dhe social, korrupsioni, nepotizmi, etj., e cila për fat të keq është rrënuar dhe përmbysur me kokë për toke nga sjelljet dhe veprimet e papërgjegjshme të shumë politikanëve të cilët pa fije turpi vodhën dhe uzurpuan pasuritë e popullit të shumë vuajtur shqiptar në Kosovë!
Mërgata jonë zulmë-madhe, patriotike, sakrifikuese dhe kontribuuese kryesore në arritjen e lirisë dhe pavarësisë së Kosovës, ani pse ndjehet e injoruar, e mjelë në kufi dhe shumë keq e trajtuar nga qeveritë e deritanishme, etj., ajo pranë gjithë këtij mohimi dhe mosnjohjeje të meritave të saj për lirinë e Kosovës e fituar me aq shumë gjak, gjithnjë është e gatshme që edhe sot ta ndihmojë vendlindjen në planin e rimëkëmbjes së saj ekonomike, u konstatua ndër të tjera në këtë takim pune. Prandaj, siç u tha, me shumë firma gjermane janë shtuar kontaktet dhe përpjekjet e aktivistëve dhe biznesmenëve tanë këtu për të gjetur forma dhe mundësi të reja bashkëpunimi me këtë vend mik në shumë fusha të ekonomisë, në vazhdën e të cilave përpjekje ishte edhe takimi i sotëm më njërin nga biznesmenët e shquar gjermanë për të parë mundësinë e investimeve të përbashkëta në projekte të ndryshme zhvillimore në Kosovë.
Ishte konstatim i përbashkët, po ashtu, se Mërgata shqiptare në Gjermani si dhe në vendet tjera perëndimore ka potencial të madh profesional ku të rinjtë tanë tani më i kanë kryer studimet në lëmi të ndryshme siç dhe përbëjnë edhe një gjeneratë të re e cila është e gatshme të kthehet në atdhe që dijen dhe përvojat e fituara në vendet e zhvilluare të Perëndimit t’i aplikojë në Kosovë përmes projekteve të shumta ekonomike, sociale, kulturore turistike dhe sportive.
Takime të kësaj natyre do të mbahen edhe në të ardhmen!
