Autoritetet policore italiane kanë zbuluar në komunën Miramare në provincën e Riminit një rafineri droge të tipit heroinë, kokainë e metanfetaminë.
Në një apartament janë sekuestruar rreth 22 kg lëndë narkotike e përbërë nga 19 kg metanfetaminë, 2.5 kg heroinë e gjysmë kg kokainë. Në pranga është vënë shtetasi shqiptar Regis Hoxha 28-vjeç, banues në rajonin e Umbrias pa precedent penal e me leje të rregullt qëndrimi në Itali.
Droga vlerësohet të kapë një vlerë shitje prej 260 mijë euro.
Hetimet paraprake të autoriteteve policore italiane dyshojnë se shqiptari i arrestuar është një korrier droge që po përgatiste të shiste lëndën narkotike gjatë periudhës së festave të dimrit në territorin e provincës së Riminit.
Rezident në rajonin e Umbria, 28-vjeçari shqiptar kishte marrë me qira një apartament në komunën e Miramares duke e kthyer në një rafineri të vërtetë droge.
Në apartament u sekuestruan instrumente për përgatitjen e dozave të drogës, peshore, mixer etj.
Korrieri shqiptar përdorte për të lëvizur një automjet në pronësi të një personi tjetër.
Hetimet e antidrogës italiane vazhdojnë për të zbuluar bashkëpunëtorët e shqiptarit të arrestuar.
