Një konflikt me thika midis disa të rinjve, ka përfunduar me plagosjen e dy prej tyre.
Ngjarja ka ndodhur para një supermarketi në Cërrik, ku mësohet se kanë qenë 5 të rinj, të identifikuar me inicialet E. B., N. B., (vëllezër) dhe S. S., E. B., N. Ç., të cilët janë konfliktuar me njëri-tjetrin.
Për pasojë, dy prej të rinjve, E. B., dhe N. B., respektivisht 29 e 24 vjeç, janë plagosur dhe kanë përfunduar në spital. Sipas raportimeve të para mësohet se të plagosurit fatmirësisht ndodhen në spital jashtë rrezikut për jetën.
Në prangat e Policisë, mësohet se ka rënë N, Ç., 28 vjeç, si autor i dyshuar i sulmit dhe plagosjes me thikë, dhe po punon për kapjen e dy të tjerëve.
Njoftimi i Policisë
Këtë të premte në qytetin e Cërrikut, para një supermarketi, pas një konflikti të çastit mes shtetasve E. B., N. B., (vëllezër), dhe N. Ç., S. S., E. B., janë plagosur me mjet prerës (thikë) shtetasit E. B., 29 vjeç dhe N. B., 24 vjeç, banues në Elbasan, të cilët ndodhen në spitalin e Elbasanit nën kujdesin e mjekëve jashtë rrezikut për jetën.
Me marrjen e njoftimit shërbimet e Policisë Cërrik kanë ndërhyrë menjëherë duke arrestuar në flagrancë njërin prej autorëve të dyshuar konkretisht shtetasin N. Ç., 28 vjeç.
Forcat e Policisë janë vënë në ndjekje të dy shtetasve të tjerë S. S., dhe E. B., të dyshuar si autorë të ngjarjes, ku vijon ndjekja për kapjen e tyre. Grupi hetimor po vijon punën për zbardhjen dhe dokumentimin e plotë të kësaj ngjarje”, thuhet në njoftimin e policisë.
