Policia greke thotë se ka hetuar të gjitha rastet e vrasjeve të shtetasve shqiptarë në territorin grek kohët e fundit.
Në një deklaratë për media, Drejtoria e Përgjithshme e Policisë greke thotë se të gjitha ngjarjet janë zbardhur, por pa u ndalur konkretisht tek secila prej tyre.
“Në lidhje me vrasjet e fundit të shtetasve shqiptare ne Greqi, bëjmë me dije se:Për të gjitha rastet, policia greke ka nisur hetimet paraprake dhe ka ndërmarrë të gjitha hapat e nevojshme procedurale në bashkëpunim me prokurorinë, me qëllim zbardhjen e rasteve, krijimin e akuzave si dhe identifikimin dhe kapjen e autorëve. Sqarojmë se të gjitha ngjarjet janë zbardhur”, deklaron policia greke.
Katër shqiptarë janë vrarë në Greqi nga nëntori deri në mbrëmjen e kaluar.
Viktima e fundit ishte 18 vjeçari nga Leskoviku, i identifikuar me emrin Mario Isa, cili është ekzekutuar natën e së martës në Kavala.
Hetuesit thanë se viktima ka marrë dy goditje me armë zjarrri nga afër, çka i ka sjellë edhe vdekjen e menjëhershme.
Sipas mjekëve ligjorë, shqiptari është qëlluar me armë nga pas, ndërsa në dorë janë gjetur disa kartmonedha 50 euroshe.
Autori i dyshuar i vrasjes së 18 vjeçarit shqiptar pretendon se e ka qëlluar aksidentalisht viktimën.
Paraprakisht, mjekësia ligjore bën me dije se një plumb që ka goditur në gjoks të ndjerin, i ka shpuar mushkërinë.
Më 26 nëntor Petrit Zifle, 63 vjeç u vra nga greku Dhimitris Kuris, një ekstremist i Agimit të Artë.
Më 22 nëntor Altin Mulla, 39 vjeç u vra në zonën e Pogonit, Janinë, në kufi sipas policisë greke gjatë një shkëmbimi zjarri mes disa trafikantëve të drogës dhe policisë greke.
Më 25 nëntor një 35-vjeçar u gjet pa jetë në burgun e Trikalas.