Gjatë inspektimit të punimeve në Pediatrinë e Durrësit, ministrja Manastirliu prezantoi 7 mjekët specialistë që i shtohen këtij spitali, nga 168 mjekët me kontrata të lidhura në të gjithë spitalet e vendit. Pediatria e spitalit rajonal të Durrësit po rindërtohet me themel, për t’u shndërruar në një spital modern, me infrastrukturë dhe aparatura mjekësore të teknologjisë së lartë.
Ministrja e Shëndetësisë dhe Mbrojtjes Sociale Ogerta Manastirliu inspektoi nga afër punimet për rindërtimin e pediatrisë të spitalit rajonal Durrës, e cila do t’u shërbejë rreth 55 mijë pacientëve në vit. “Pediatria e Durrësit po investohet për t’u kthyer në një spital modern, falë investimit të qeverisë në vlerë 262 milion lekë. Një investim shumë i rëndësishëm për qytetin e Durrësit, por jo vetëm, edhe për turistët e shumtë që frekuentojnë plazhin gjatë sezonit turistik”– tha Manastirliu. Duke u ndalur tek investimi për burimet njerëzore, Manastirliu, e cila u shoqërua gjatë vizitës në spital nga mjekët e rinj specialistë, u shpreh: “7 mjekë specialistë i shtohen spitalit rajonal të Durrësit, për shërbime shumë të rëndësishme si Pediatria, Kirurgjia, Urgjenca, Kardiologjia, etj. Plotësojmë kështu shumë nga nevojat në spitalet tona rajonale me përfundimin e specializiemeve të 300 mjekëve specialist, mbi 160 prej të cilëve do të shërbejnë pikërisht në spitalet rajonale dhe bashkiake, duke filluar nga ky muaj”.
E pyetur në lidhje me projektligjin për mbrojtjen nga produktet e duhanit, Manastirliu u shpreh se jemi në fazë konsultimesh me grupet e interesit, për projektligjin e ri. “Synimi ynë është të forcojmë akoma më tej masat kundër duhanpirjes në ambientet publike, për të mos lejuar askënd të abuzojë me ligjin, duke shkuar deri në mbyllje të aktivitetit dhe heqje të licencës për ato subjekte që gjobiten në mënyrë të vazhdueshme. Sepse për ne parësor është shëndeti i qytetarëve” – u përgjigj ministrja.
Manastirliu deklaroi se Shqipëria është renditur 7 vende më lart sipas raportit Bloomberg për përmirësimin e treguesve shëndetësore, ndaj edhe në bazë të rekomandimeve të Organizatës Botërore të Shëndetësisë, do të vijojnë të forcohen masat për duhanpirjen në ambientet publike.
