Nënë e bir u gjetën pa jetë, të kapur dorë për dore nën rrënoja në Durrës

Durrësi

Nënë e bir u gjetën pa jetë, të kapur dorë për dore nën rrënoja në Durrës

Më: 28 nëntor 2019 Në ora: 06:16
Durrës

Forcat rumune kanë arritur të lokalizojnë trupat e tre personave që ishin nën rrënoja në pallatin gjashtë katësh në Lagjen nr.18 në Durrës.

Mësohet se nën rrënoja janë gjetur një grua 47 vjeçe dhe një i ri 22 vjeç, të cilët janë nënë e bir.

Forcat rumune që po kryejnë operacionin njoftuan se i kanë gjetur nënë e bir të pajetë të kapur dorë për dore nën rrënoja.

Personi i tretë që gjendej nën rrënoja ishte nëna e piktores Diena Karanxha.

Vajza e Dienës, Esiela 8 vjeçe u nxorr pa jetë nga ky pallat, ndërsa Diena 30 vjeçe u nxorr gjallë nga rrënojat por më pas ndërroi jetë në spital.

Në Lagjen 18, pranë stadiumit në Durrës, në një ndërtesë supozohet se edhe një person ka mbetur brenda rrënojave.

Aty deri tani janë nxjerrë gjashtë persona, ndërkohë ekipet po vazhdojnë të kërkojnë edhe për personin që thuhet se vazhdon të jetë brenda gërmadhave.

Shefi i Grupit Parlamentar të PS-së në Kuvendin e Shqipërisë, Taulant Balla ka falënderuar ekipet rumune, që siç tha ai meritojnë falënderimet për çdo gjë që kanë bërë dhe do të vazhdojnë ta bëjnë.

“Nga dyshimet që kanë dhe sigurisht nga çfarë është biseduar, është edhe një zonjë e moshuar që mund të gjendet poshtë rrënojave e që trupat rumune në bashkëpunim me Renea do të vazhdojnë të punojnë edhe përgjatë natës, me shpresë që të gjendet sa më shpejtë.

Dy personat që u gjetën ishin një nënë 47 vjeçare dhe një djalë 22 vjeçar. Zgjati 12 orë gjithë procedura për t’i nxjerrë për shkak se nëna dhe djali ishin të përqafuar poshtë rrënojave, kjo ishte edhe arsyeja pse u vonua nxjerrja e tyre”, tha ai.

E nga ekipi rumun u tha se në këtë zonë nevojitet të punohet të paktën edhe 24 orë.

commentFirst article
Sot mund të lexoni Shfletoni kopertinat