Prej gati 30 vjetësh pjesën më të madhe të kohës e kalon aty, duke krijuar punime sa modern aq edhe futuriste, pse jo edhe të pakuptueshme nga masa. Aleksandër Moisiu i tij, është në një shesh në Vjenë, ashtu sikurse Xhon Lenoni në Durrës. Punimet e tij janë në sheshet kryesore të qytetit të Durrësit, ndërsa të tjera presin që të realizohen.
Është skulptori Qazim Kërtusha, që pa frikë mund të quhet “babai” i skulpturës durrsake, për mjeshtërinë e tij, për pasionin, për talentin, për pasqyrimin realist, modern, inovativ të veprave të tij.
“DurrësLajm” ka hyrë në studion e artistit, duke parë nga afër veprat e tij, prej diplomimit në universitet, e deri te veprat që ka në dorë me të cilat po konkurron.
Është tërësisht antikonformist, me punën e tij nuk bën lëshime, është aq kokëfortë tek ajo çfarë kërkon si fillim nga vetja, deri te realizimi i fundit i bocetit.
Dëshmitar i jetës në 6 dekada në Durrës, ish-nxënës i arkeologut të madh Vangjel Toçi, një skulptor i pakompromis e vizionar, Qazim Kërtusha na rrëfen të gjithë historinë e jetës së tij, nëpërmjet punimeve në studio.
Një skulptor pa bashkëpunimin e arkitektëve nuk mund të ecë përpara. Në studion e tij, janë të gjitha, prej punimeve të para e deri tek ato që presin të shfaqen.
Është autor i disa ekspozitave personale e me bashkëpunëtore. Është autor i një ekspozite të veçantë të hapur në qytetin tonë, atëherë kur të gjithë arratiseshin nga vendi.
Në 1997-n e largët pati guximin që të ekspozonte punimet e tij pranë Torrës Veneciane, për të treguar se edhe në kohë lufte, arti është triumfues.
Në studion e tij punimet paraqesin jetën e këtij qyteti. Janë disa punime të frymëzuara nga eksodi i madh i vititi 1991, atëherë kur mijëra shqiptarë braktisën atdheun nga porti i Durrësit në kërkim të lirisë. Projekti për ta monumentalizuar këtë ngjarje të madhe në historinë tonë, është aty, por nga ana e krerëve bashkiakë ka munguar vizioni për të formëzuar në objekte ngjarjet që kanë lënë gjurmë të pashlyeshme në memorien e qytetarëve durrsakë e jo vetëm, nëpërmjet veprave të artit.
Kërtusha është një nga pionierët e skulpturës së parkut në Durrës qysh para viteve 1990, sikurse ishin ato në lulishten në hyrje të qytetit të Durrësit (grila dekorative dhe shatërvani me mozaik e pulëbardha), që u dëmtuan dhe u shkatërruan gjatë viteve të tranzicionit.
Kërtusha thotë se ka ardhur momenti që skulptura të shihet ndryshe. Ajo duhet të jetë pjesë e modelimit urban, pra, pjesë e peizazhit qytetës. Artisti mendon se bashkëpunimi midis skulptorëve dhe urbanistëve duhet të jetë shumë i madh.
Qazim Kërtusha dallohet për “kokëkrisjen” e tij artistike, jokonformizmin dhe idetë novatore për skulpturën e zbatuar në mjedise urbane. Është një nga pionierët e skulpturës së parkut në Durrës qysh para viteve 1990, sikurse ishin ato në lulishten në hyrje të qytetit të Durrësit, përballë stacionit hekurudhor të udhëtarëve, që, fatkeqësisht, u dëmtuan dhe u shkatërruan gjatë viteve të tranzicionit. Grilën dekorative dhe shatërvanin me mozaik i gjen vetëm nëpër filmat artistikë apo në ndonjë foto të kohës .
Një nga veprat më të bujshme në skulpturën e parkut është kompozimi i këngëtarit britanik Xhon Lenon (John Lennon), një nga atraksionet turistike më interesante të Durrësit.
