Durrës, kontrolle në plazhe. Tatimorët mësyjnë edhe hapësirat publike - Bota Sot
Durrës, kontrolle në plazhe. Tatimorët mësyjnë edhe hapësirat publike

Durrësi

Durrës, kontrolle në plazhe. Tatimorët mësyjnë edhe hapësirat publike

Më: 4 korrik 2018 Në ora: 12:07
Durrës, kontrolle në plazhe

Pushuesit, vështirë të gjejnë hapësira publike në plazhet e shumta të Durrësit. Ekzistojnë vetëm plazhet private me pagesë, ndërsa ata që duan të pushojnë nën hijen e çadrës së tyre në bregdet e kanë thuajse të pamundur.

Kjo situatë e përsëritur ndër vite, edhe këtë sezon ka marrë vëmendjen e strukturave ligjzbatuese, që kanë nisur kontrollet e subjekteve për shlyerjen e detyrimeve tatimore e vendore, si dhe marrjen e masave të sigurisë në hapësirat e brezit të rërës, që shfrytëzojnë për qëllime fitimi pa përjashtuar ruajtjen e sipërfaqes, për të cilën kanë marrë leje pranë pushtetit vendor.

E ngritur pranë Prefekturës së Qarkut të Durrësit për mbarëvajtjen e sezonit turistik, “Forca e ligjit” ka nisur kontrollet në plazhe.

“Po ushtrojmë aktivitetin në plazhet e Durrësit, kontrolle për plazhet, hoteleritë dhe restorantet. Në këtë grup marrin pjesë disa institucione të lidhura me mbarëvajtjen e sezonit turistik. Kontroll është ushtruar dhe për vendbazimet e mjeteve motorike lundruese të argëtimit. Në Currila nuk ka pasur probleme, por në plazhe të tjera janë konstatuar probleme dhe po monitorohen për marrjen e masave në vazhdim”, thotë Jani Tati, drejtues i “Task Forcës” së Prefekturës së Durrësit.

Këtë fillimjave, kontrolli është përqëndruar në plazhin e Currilave, ku hapësira publike, ndonëse e vogël në krahasim me atë të shfrytëzuar nga subjektet, është respektuar dhe pushuesit, të pashqetësuar shijojnë banjot e diellit e të ujit.

Ndërkohë, në fokus të kontrolleve është dhe cilësia e ujit të pijshëm, që ofrohet nga subjektet në bare e restorante, si dhe ujit të përdorur në pishina dhe atij detar në pjesën para plazheve.

Shfaq komentet
comments powered by Disqus
Më të lexuarat
Sot mund të lexoni Shfletoni kopertinat
Sondazh
test
Tjera