Konsumi privat u zgjerua me 3.3% në terma vjetorë në tremujorin e dytë, lehtësisht më shumë se një tremujor më parë (3%), bën të ditur Banka e Shqipërisë.
Prej dy vitesh, konsumi privat mbetet kontribuuesi kryesor i rritjes së kërkesës agregate. Gjykuar mbi tregues të tërthortë të cilët japin informacion më të detajuar mbi kategoritë e konsumit, rritja e tij u mbështet nga një kontribut i shtuar i shpenzimeve për shërbime dhe për mallra të konsumit afatshkurtër.
Nga ana tjetër, vëren Banka Qendrore, tregues nga vrojtimet, por edhe ata sasiorë nga indeksi i tregtisë me pakicë, sugjerojnë se është ngadalësuar konsumi për mallra afatgjatë. Bazuar në vrojtimin e besimit të konsumatorit, balancat përbërëse të treguesit të besimit konsumator vijojnë të qëndrojnë mbi mesataren historike.
Rritja e konsumit privat është mbështetur nga rritja e punësimit, të ardhurat nga remitancat dhe kredia për individë, në tremujorin e dytë. Gjithashtu, ajo është favorizuar nga ambienti me norma të ulëta interesi.
Për tremujorin e tretë, priten norma rritjeje të konsumit privat të ngjashme me atë të dy tremujorëve të parë të vitit. Kjo është në një linjë me sinjalet pozitive të dhëna nga rritja e të ardhurave nga tatimi mbi vlerën e shtuar dhe rritja e indeksit të vëllimit të shitjeve në tregtinë me pakicë. Ecuria pozitive e punësimit dhe rritja e remitancave janë faktorë që mbështesin vlerësimet për rritje të shpenzimeve konsumatore. Edhe tregues të tjerë afatshkurtër, si importi i automjeteve dhe kredia konsumatore, me gjithë ngadalësimin e shfaqur në tremujorin e tretë, mbeten në kahun rritës, vlerëson Banka e Shqipërisë. /ATSH
