Gjatë ditës së djeshme, ministri i Zhvillimit Ekonomik, Valdrin Lluka kishte dhënë lajmin se ka filluar implementimin i marrëveshjes për heqjen e tarifave për roaming.
Lidhur me këtë, ka pasur reagime nga deputeti i AAK’së Muharrem Nitaj i cili ka thënë se ministri është keqinformuar sepse roamingu me Shqipëri nuk është hequr, por vetëm ka zbritje.
“Është i pasaktë lajmi se qytetarët e Kosovës prej sot mund të komunikojnë pa roaming nga Shqipëria! Ka ulje çmimesh por romingu nuk është hequr, ai më së paku duhet të jetë i keqinformuar”, ka shkruar Nitaj në facebook.
Lluka ka sqaruar këtë çështje.
Ai ka thënë se ka filluar implementimi i marrëveshjes për heqjen e tarifave roaming, dhe se në marrëveshje thuhet se pas nënshkrimit fillon zbritja e çmimit rreh 90%.
“Marrëveshja thotë qartë se menjëherë fillon zbritja e çmimit rreth 90%, e në vitin 2021 do të hiqen tërësisht”, ka thënë Lluka.
Marrëveshja për heqjen e tarifave të roamingut mes Kosovës dhe Shqipërisë, ishte nënshkruar në mbledhjen e dy qeverive në Pejë në nëntor të vitit të kaluar.
