Një tjetër marrëveshje ekonomike pritet të bëhet mes Kosovës dhe Serbisë.
Kësaj radhe, mes Odave ekonomike të të dyja vendeve.
I dërguari i posaçëm për dialogun Kosovë- Serbi, Richard Grenell, në janar të këtij viti, deklaroi se Administrata e Presidentit Trump është shumë e fokusuar në krijimin e vendeve të punës nga bizneset amerikane, duke cekur që komuniteti i biznesit është pjesa më e rëndësishme e zgjidhjes së problemit Serbi-Kosovë.
Pas këtyre fjalëve, me ndërmjetësimin e ambasadorit Grenell disa ditë më vonë erdhi marrëveshja e parë ajo e linjës ajrore, e më pas pasoi edhe marrëveshja në Zyrich të Zvicrës për hekurudhat e autostradat.
Por, duket se kjo nuk do të jetë marrëveshja e fundit e ndërmjetësuar nga ambasadori Grenell për komunitetin e biznesit.
Kjo pasi Syri.net Kosova, nga burimet e veta ka marrë vesh se, në fund të muajit mars, do të nënshkruhet një marrëveshje tjetër.
Kësaj radhe objekt i marrëveshjes do të jenë Oda Ekonomike e Kosovës dhe ajo e Serbisë.
Media ka marrë vesh që ky takim do të zhvillohet me datat 27, 28, 29 mars 2020 në Amerikë.
Kryetari i Odës Ekonomike Berat Rukiqin, ka thënë se nuk ka konfirmim se a do të mbahet ky takim, dhe se atje nuk shkojnë për të nënshkruar ndonjë marrëveshje.
“Takim të konfirmuar nuk ka ende, për marrëveshje nuk bëhet fjalë, por për një tryezë e cila do të organizohet për promovimin e bizneseve në teknologji”, ka thënë shkurt Rukiqi.