Dita e fundit e muajit mars ishte afati i fundit kur zyrtarët e lartë të institucioneve kanë pasur për detyrë ta publikojnë pasurinë e tyre për 2016.
Por, ka të tillë që nuk kanë përfillur këtë rregull. Drejtori i Agjencisë Kundër Korrupsionit, Shaip Havolli, premtoi se gjatë kësaj jave do të bëhen publik edhe emrat e këtyre zyrtarëve, duke shtuar se numri më i madh i tyre e kanë përfunduar këtë obligim ligjor.
“Sa i përket deklarimit të pasurisë që kanë qenë të obliguar deri me 31 mars, shumica e zyrtarëve të lartë kanë deklaruar pasurinë dhe jemi në fazën verifikuese për ata që nuk e kanë deklaruar pasurinë dhe gjatë javës do të bëhen publike këta emra”, tha Havolli.
Javë më parë Agjencia Kundër Korrupsionit ka bërë publik raportin vjetor të punës për vitin 2016.
