Ushqimi i gatuar nga gratë e Krushës u ofrua sot në Prishtinë, në kuadër të iniciativës solidarizuese për t’i mbështetur gratë sipërmarrëse nga Krusha.
Ky aktivitet promovues u organizua nga Qendra për Art dhe Komunitet “Artpolis”, në kuadër të gjashtëmbëdhjetë ditëve të aktivizimit kundër dhunës në baza gjinore.
Ushqimi tradicional i gatuar nga këto gra u servua në njërin nga lokalet në Prishtinë, derisa paratë e grumbulluara nga shitjet e ushqimit do të jenë kontribut për bizneset e vogla të grave të Krushës.
Për këtë kontribut, foli më saktë koordinatorja e organizatës “Artpolis”, Jeta Berisha.
Berisha: Gratë e Krushës po ndihmojnë komunitetin
“Fillimisht jemi munduar të gjejmë një lloj komunikimi me gratë e Krushës, duke e ditur situatën në Krushë dhe duke e ditur se sa shumë janë përfshirë këto gra në iniciativat për përgatitjen e ushqimeve të ndryshme dhe shitjen e tyre në komunitet, ato përveç që ndihmojnë familjet e tyre, i ndihmojnë edhe komunitetit”, ka thënë ajo.
Në fund koordinatorja ndau mjete te gastronomisë si donacion për gratë e Krushës, dhe i inkurajoi ato për punën e tyre.
Përndryshe, organizimi ka vazhduar në Prizren, ku është shfaqur performanca artistike e cila flet për ngacmimet seksuale, si dhe paneli i diskutimit “(PA)Punësimi i grave të reja dhe dhuna në punë”.