Haradinaj: Energjia parakusht për zhvillim të qëndrueshëm ekonomik - Bota Sot
Haradinaj: Energjia parakusht për zhvillim të qëndrueshëm ekonomik

Ekonomi

Haradinaj: Energjia parakusht për zhvillim të qëndrueshëm ekonomik

Më: 19 nëntor 2018 Në ora: 17:48
Ramush Haradinaj

Kryeministri i Kosovës, Ramush Haradinaj, gjatë vizitës së tij zyrtare në Austri, ka takuar zëvendësdrejtorin e Komunitetit të Energjisë Dirk Buschle, me të cilin ka biseduar për situatën energjetike në Kosovë dhe rajon.

Kryeministri  e ka njoftuar Buschle për zhvillimet aktuale politike dhe zhvillimore në Kosovë, për kapacitetet energjetike të Kosovës dhe për projektin e Termocentralit 'Kosova e Re', për të cilin tha se do t'i hapte mundësi zhvillimit ekonomik të vendit dhe do t'i krijonte lehtësi të shumta funksionimit të bizneseve në vend.

Kryeministri Haradinaj dhe Buschle kanë biseduar edhe për Marrëveshjen e Energjisë të arritur ndërmjet Kosovës dhe Serbisë, për të cilën Haradinaj tha se deri më tani Serbia nuk i është përmbajtur marrëveshjes duke paraqitur pengesa në zbatim dhe të cilat kanë ndikuar drejtpërdrejt në ekonominë e vendit, duke kërkuar që Komuniteti i Energjisë të ketë rol në zgjidhjen e kësaj çështjeje.

Gjatë takimit,  kryeministri  ka shprehur përkushtimin e Kosovës për ndërtimin e kapaciteteve për prodhimin e energjisë së ripërtëritshme, duke kërkuar nga  Buschle dhe Komuniteti i Energjisë mbështetjen për sektorin energjetik në Kosovë.

Ndërkaq, zëvendësdrejtori i Komunitetit të Energjisë tha se do të ofrojë përkrahjen e tij dhe të Komunitetit të Energjisë në zgjidhjen e mosmarrëveshjeve ndërmjet Kosovës dhe Serbisë, sa i përket Marrëveshjes për Energjinë, në të njëjtën kohë shprehu gatishmërinë e institucionit për ta mbështetur Kosovën në sektorin e energjisë.

Shfaq komentet
comments powered by Disqus
Më të lexuarat
Sot mund të lexoni Shfletoni kopertinat
Sondazh
test
Tjera