Bullgaria pas rënies së regjimit komunist në vitin 1989 kishte rreth nëntë milionë njerëz, dhe 28 vjet më vonë ka rreth shtatë milionë.
Shkaqet kryesore janë rënia e numrit të lindjeve dhe migracioni ekonomik. Bullgaria konsiderohet vendi më i varfër i Bashkimit Evropian. Sipas Institutit të Statistikave të Bullgarisë, vendi gjatë periudhës 1989-2017 ka humbur rreth dy milionë njerëz.
Siç raportohet, në vitin 2018 në Bullgari ka lindur 60.000 bebe, ndërsa vdiqën 110.000 banorë.
Sipas zëvendës-presidentes së Bullgarisë Ilijana Iotova, në vendin e BE-së ku është regjistruar norma më e lartë e mortalitetit, çdo muaj në hartë zhduket një fshat, pasi të rinjtë, për shkak të kushteve më të mira të jetesës, braktisin atdheun dhe gjejnë strehim në vendet tjera të BE-së.
Në rast se Bullgaria vazhdon të ketë situatë të keqe ekonomike, dhe migrim të lartë, popullsia në këtë vend deri në vitin 2050 mund të bjerë në 5.2 milionë.
