Një balenë me plastikë të mbushur në stomak u gjet e vdekur në një plazh të Sicilisë, rasti i pestë i tillë në pesë muajt e fundit në Itali.
Balena shtatëvjeçare u zbulua në qytetin e Cefalos në Sicili. Rasti i fundit u zhvillua në mars, kur deti në Sardenjë hodhi një balenë femër me një fëmijë të pa lindur, e cila kishte 22 kilogramë plastikë në stomak.
"Deti na dërgon një thirrje për ndihmë, SOS të dëshpëruar. Ne duhet menjëherë të bëjmë diçka dhe të shpëtojmë ato krijesa të mrekullueshme që jetojnë në të,"tha aktivisti Giorgio Monti.
