Një zjarr masiv ka shkrumbuar dhjetëra hektarë pyje në qendër të Portugalisë, duke vënë në rrezik jetën e qytetarëve.
Aktualisht, numërohen rreth 20 të lënduar, një prej qytetarëve u shoqërua në spital me plagë të rënda djegieje.
Më shumë se 1700 forca zjarrfikëse janë mobilizuar për kontrollimin e flakëve, por terreni i vështirë malor vështirëson misionin e tyre. Thatësira dhe temperaturat e larta janë gjithashtu kundër forcave zjarrfikëse që janë ndihmuar nga dhjetëra avionë për shuarjen e flakëve nga ajri.
Pista kryesore e hetuesve portugezë është ajo e zjarrvënës së qëllimshme. Autoritetet vendase arrestuan një 55-vjeçar, i cili dyshohet se i ka vënë flakën pyjeve.
Zjarret masive në Portugali janë një fenomen jo i rrallë. Në vitin 2017, flakët që përpinë pyjet, shkaktuan rreth 100 viktima.
