Agjencia Ndërkombëtare për Energji Bërthamore (ANEB) tha se do të emërojë drejtorin e ri të përgjithshëm në tetor, pasi kreu i deritashëm, Yukiya Amano, ka vdekur dy javë më parë.
Agjencia me seli në Vjenë tha të enjten, pas takimit të bordit të guvernatorëve, se vendet anëtare mund t'i paraqesin nominimet e tyre deri më 5 shtator.
Bordi "pret që të emërojë drejtorin e përgjithshëm në tetor 2019 dhe, në çdo rast, parashikon që personi i emëruar ta marrë detyrën jo më vonë se 1 janari, 2020", thuhet në deklaratë.
Gara për të pasuar Amanon vjen në kohën e tensioneve të larta ndërkombëtare mbi programin bërthamor të Iranit.
Diplomati rumun, Cornel Feruta, 43 vjeç, do ta drejtojë agjencinë derisa të bihet dakord për pasardhësin e Amanos, i cili vdiq në moshën 72-vjeçare nga shkaqe të paspecifikuara.
