Ministria e Shëndetësisë e Turqisë njoftoi se 46 persona kanë vdekur nga koronavirusi gjatë 24 orëve të fundit në këtë shtet, duke e çuar në 214 numrin e përgjithshëm të viktimave.
Sipas kësaj ministrie, gjatë 24 orëve të kaluara u infektuan 2704 persona dhe kështu shifra e përgjithshme e të prekurve nga virusi i ri shkoi në 13 mijë e 531 persona, shkruan “Anadolu”.
Mbi 240 pacientë janë shëruar dhe janë liruar nga spitalet, ndërsa 847 të tjerë janë duke u trajtuar në sektorët e kujdesit intensiv për shkak të gjendjes më të rëndë shëndetësore.
Vetëm për një ditë, autoritetet shëndetësore turke i testuan mbi 15 mijë persona, që do të thotë se 92 mijë njerëz në mbarë vendin janë testuar për koronavirus deri më tani.
Ndryshe, rastet e para të virusit të ri u shënuan në Wuhan të Kinës në dhjetor të vitit të kaluar, ndërsa sëmundja tash është përhapur në rreth 180 shtete dhe territore në mbarë botën.
Deri në mëngjesin e së mërkurës, 860 mijë njerëz në mbarë botën janë infektuar dhe mbi 42 mijë e 300 kanë vdekur nga pandemia Covid-19.
