Një urolog belg ka folur për përvojën e tij "të jashtëzakonshme", pasi i mbijetoi COVID-19 dhe u lirua nga kujdesi intensiv pas tre javësh në gjendje kome.
"Po shihja fundin tim," tha Antoine Sassine nga dhoma e tij në spitalin Delta Chirec të Brukselit, ku ai punonte. "Mendova se do të vdisja dhe nuk do të zgjohesha kurrë."
58-vjeçari dhe ekipi i tij u diagnostikuan të gjithë në spital dhe ai u pranua në njësinë e kujdesit intensiv kur simptomat e tij u përkeqësuan, raporton Reuters.
Sassine ishte vendosur në gjendje kome të induktuar, por thotë se ishte në dijeni të dëshirës së tij për të luftuar sëmundjen dhe se ai kishte vizione edhe për babanë e tij të ndjerë.
Duke përshkruar përvojën si "të jashtëzakonshme", Sassine, i cili u shpërngul nga kujdesi intensiv të martën, tha: "Pashë babanë tim, i cili vdiq katër vjet më parë. Fola me të. "
"Gëzimi im më i madh ishte kur u zgjova dhe pashë fytyrat e miqve të mi, ishte e papërshkrueshme."
Tani ai mezi pret të përqafojë familjen e tij, të cilën nuk e ka parë që kur është diagnostikuar.
Belgjika ka raportuar 38.496 raste të konfirmuara të COVID-19, me 5.683 vdekje.
