Rusia qëndron prapa sulmit kibernetik në parlament, thotë ministrja norvegjeze

Evropë

Rusia qëndron prapa sulmit kibernetik në parlament, thotë ministrja norvegjeze

Më: 14 tetor 2020 Në ora: 00:42
Ministrja e Jashtme e Norvegjisë, Ine Eriksen Soereide.

Ministrja e Jashtme e Norvegjisë, Ine Eriksen Soereide, tha më 13 tetor se Rusia ka qenë prapa një sulmi kibernetik kundër parlamentit norvegjez në muajin gusht.

Parlamenti norvegjez tha më 1 shtator se kishte qenë në shënjestër të një sulmi kibernetik dhe se llogaritë e postës elektronike të disa ligjvënësve dhe punonjësve ishin hakuar.

"Bazuar në informacionin në dispozicion është vlerësimi ynë që Rusia qëndroi pas kësaj veprimtarie", tha Ine Eriksen Soereide.

Norvegjia ka synuar të ketë një marrëdhënie pragmatike me Rusinë, por nuk mund të pranojë sulme të tilla kundër institucioneve të saj demokratike, shtoi ajo, kur u pyet nëse sulmi do të ndikonte në marrëdhëniet midis Norvegjisë dhe Rusisë.

"Ne nuk mund të pranojmë që parlamenti të jetë objekt i sulmeve të tilla", tha ministrja.

Ambasada e Rusisë në Oslo e hodhi poshtë pretendimin, duke thënë se akuza norvegjeze ishte "një provokim i qëllimshëm".

“Ne i konsiderojmë akuzat e tilla për vendin tonë si të papranueshme. Ne e konsiderojmë këtë si një provokim serioz dhe të qëllimshëm, i cili është i dëmshëm për marrëdhëniet dypalëshe", shkroi ambasada në një koment në Facebook.

Norvegjia, e cila është anëtare e NATO-s, ka një kufi me Rusinë në Arktik. /REL

commentFirst article
Sot mund të lexoni Shfletoni kopertinat