Zvicra ka nevojë urgjente për mjekë e infermierë, ky është apeli dramatik i Spitalit të Gjenevës

Evropë

Zvicra ka nevojë urgjente për mjekë e infermierë, ky është apeli dramatik i Spitalit të Gjenevës

Më: 26 tetor 2020 Në ora: 09:13
Foto ilustrim

Në Kantonin e Gjenevës, Spitali Universitar (HUG) ka nevojë urgjente për personel shtesë për shkak të rritjes së shpejtë të pranimeve në spital, si pasojë e valës së dytë të pandemisë së koronavirusit, shkruan Agjencia e lajmeve SDA.

Të dielën spitali ka bërë një thirrje për ish-punonjësit në pension dhe ata me pushime të papaguara, që t`i kthehen punës.

Menaxhmenti i klinikës po kërkon menjëherë vullnetarë për të marrë përsipër detyra mjekësore, infermierore ose administrative, bën të ditur klinika.

Mjekët dhe infermierët shtesë për njësitë e kujdesit intensiv, janë të nevojshmëm që të përforcojnë dhe lehtësojnë ekipet ekzistuese në spital.

Duket shumë e mundshme që numri kulmor, prej 550 pacientëve të shtruar për Covid-19, i cili qe regjistruar gjatë valës së parë të sëmundjes në pranverë, do të tejkalohet në ditët në vijim”. Kështu  citohet të ketë thënë në apelin e përmendur, drejtori i Përgjithshëm i HUG, Bertrand Levrat.

“Ne supozojmë se numri i shtretërve dhe profesionistëve të nevojshëm për t’u kujdesur për pacientët nga Covid-i dhe sëmundjet tjera do të jetë shumë më i lartë sesa ai që kemi parë këtë pranverë”.

Spitali Universitar i Gjenevës ka njoftuar javën e kaluar për masat që paraqiten të nevojshme.

Ashtu si në pranverë, spitali do të shndërrohet në një klinikë të specializuar për pacientë me Covid-19. Ndërkohë, përveç për Covid-19, këtu do të kryhen vetëm operacione urgjente. Në pranverë qe punësuar po ashtu staf shtesë prej 400 personash.

Autoritetet shëndetësore të Gjenevës të mërkurën kanë hprehur frikën se do të mbingarkohen nga fluksi i pacientëve. Ata druajnë se do t`u duhet të vendosin se cilin person të trajtojnë dhe cilin ta lënë në fatin e tyre.

Shfaq komentet
comments powered by Disqus
Sot mund të lexoni Shfletoni kopertinat