Jep dorëheqjen përmes Instagramit Ministri turk i Financave
Ministri i Thesarit dhe Financave të Turqisë Berat Albayrak, dhëndri i Presidentit Erdogan, dha dorëheqjen sot për “arsye shëndetësore”.
Njoftimi u bë nga vetë ministri përmes profilit të tij në Instagram.
Dorëheqja është konfirmuar më pas edhe nga burime zyrtare dhe u transmetua në mediat turke.
Dje presidenti Erdogan mori vendimin për të zëvendësuar Guvernatorin e Bankës Qendrore Murat Uysal.
Një zgjedhje, kjo e fundit, e cila shkaktoi rënien e menjëhershme të monedhës kombëtare, lira, e cila ra në nivelet më të ulëta historike ndaj dollarit.
“Pas mbajtjes së posteve ministrore për pesë vjet, unë mora vendimin për të mos vazhduar funksionin tim si ministër i Financave për shkak të problemeve shëndetësore,” shkroi Berat Albayarak.
Ai ka shtuar se dëshironte të kalonte më shumë kohë me familjen e tij, “neglizhuar për shumë vite nga puna e tij”.
Pas njoftimit të dorëheqjes, llogaria e tij në Twitter u fshi.
Albayarak u emërua Ministër i Energjisë në 2015, një pozicion që e mbajti deri në 2018, kur mori drejtimin e Financave.