Gara për të udhëhequr kristian-demokratët e Angela Merkelit (CDU) duket shumë e hapur ndërsa partia e saj shkon në votime sot, që mund të jetë hapi i parë drejt zgjedhjes së pasardhësit së kancelares gjermane.
Saktësisht 1 001 delegatët që marrin pjesë në kongresin online do të zgjedhin mes tre kandidatëve për të udhëhequr CDU-në, që janë Armin Laschet, kryeministri i landit më të populluar të Gjermanisë të Nordrhein-Westfalen, avokati Friedrich Merz ose eksperti i politikës së jashtme, Norbert Roettgen, raporton ATSh.
Votimi vjen në fillim të një viti vendimtar në politikën gjermane, me zgjedhjet kombëtare të caktuara për në shtator.
Merkel planifikon të largohet në fund të mandatit të saj të katërt aktual.
Dje, Merkel bëri thirrje për unitet.
“Shpresoj të zgjidhet një ekip që merr fatin e partisë sonë krenare në duart e veta dhe më pas punon me të gjithë anëtarët për të gjetur përgjigjet e duhura për detyrat e së ardhmes”, tha Merkel.
Tradicionalisht, kreu i CDU do të drejtojë fushatën zgjedhore si kandidat për kancelar për partinë e peshave të rënda dhe aleatët e saj me bazë bavareze, Unionin Social-Kristian (CSU).
Por këtë vit, pretendentë të tjerë të mundshëm për të udhëhequr CDU-CSU në zgjedhje kanë dalë, veçanërisht udhëheqësi i CSU Markus Soeder, i cili është gjithashtu kryeministri i Bavarisë dhe një nga politikanët më të njohur të Gjermanisë.
Soeder paralajmëroi delegatët të premten që të mos jenë të vetëkënaqur për shanset e tyre elektorale.
Një vendim mbi kandidatin për kancelar mes dy partive pritet në mars.
