OKB-ja akuzon Italinë për dështim që t’i shpëtojë mbi 200 të mbytur në det

Evropë

OKB-ja akuzon Italinë për dështim që t’i shpëtojë mbi 200 të mbytur në det

Më: 28 janar 2021 Në ora: 08:33
Ilustrim

Komisioni për të Drejtat e Njeriut i Kombeve të Bashkuara të mërkurën tha se Italia ka dështuar në detyrën e saj për ta mbrojtur jetën njerëzore duke e vonuar një mision të shpëtimit për një barkë që po përmbytej në Detin Mesdhe.

Mbi 200 persona që ndodheshin në kët barkë ishin mbytur më 11 tetor të vitit 2013 pasi kërkesat e përsëritura për ndihmë ishin injoruar, thuhet në vlerësimin e komisionit për rastin që u paraqit nga të mbijetuarit sirianë dhe palestinezë, të cilët i humbën familjarët në këtë fatkeqësi.

Barka ishte duke i transportuar rreth 400 persona, shumica sirianë, kur ishte nisur nga Libia. Drejtuesit e saj kishin lëshuar thirrje për ndihmë, kur barka ishte qëlluar me armë nga një barkë tjetër, shkruan The Guardian.

Sipas hulumtimit, autoritetet italiane u ishin përgjigjur thirrjeve për ndihmë duke ia referuar gjendjen rojës bregdetare të Maltës. Një barkë malteze kishte shkuar në vendin e ngjarjes vetëm pas gati pesë orëve, kur barka tashmë ishte fundosur.

“Nëse autoritetet italiane do t’i drejtonin menjëherë barkat e rojës bregdetare pas thirrjeve, operacioni i shpëtimit do të arrinte te barka së paku dy orë para se ajo të fundosej”, tha anëtarja e këtij komisioni, Helene Tigroudja.

“Aksidenti ndodhi në ujërat ndërkombëtare brenda zonës së kërkim-shpëtimit të Maltës, por vendndodhja ishte vërtet më së afërti Italisë dhe njërës prej anijeve të saj”, shtoi ajo.

commentFirst article
Sot mund të lexoni Shfletoni kopertinat