Brukseli do të kontrollojë eksportin e vaksinave jashtë BE-së

Evropë

Brukseli do të kontrollojë eksportin e vaksinave jashtë BE-së

Më: 28 janar 2021 Në ora: 21:10
Ilustrim

Brukseli do të krijojë një mekanizëm për të kontrolluar dërgesat jashtë BE-së të vaksinave kundër COVID-19 që janë prodhuar dhe ndalon eksportet jo legjitime, theksuan sot zyrtarët europianë, në sfondin e polemikave me laboratorin AstraZeneca.

Ky mekanizëm transparence dhe autorizimi për eksportet, që do të miratohet të premten nga Komisioni Europian, është një masë urgjente, theksuan zyrtarët përpara shtypit.

Ai do të mundësojë marrjen e informacioneve për eksportin jashtë bllokut të vaksinave kundër COVID-19, prodhuar në uzinat e lokalizuara në BE, një prej rajoneve kryesore prodhuese të vaksinës në botë, raporton ATSh.

Praktikisht, kompanitë që dëshirojnë të dërgojnë vaksina jashtë Bashkimit Europian do të duhet të kontakojnë autoritetet e shteteve anëtare ku ndodhet uzina me qëllim për të marrë dritën e gjelbër, e cila në parim duhet të jepet brenda disa minutash”, theksoi një zyrtar i lartë europian.

Përjashtime, veçanërisht për dërgesat për shkaqe humanitare, janë parashikuar.

Ky mekanizëm bazohet në një rregullore europiane që BE kishte përdorur tashmë vitin e kaluar për të rregulluar eksportet e pajisjeve mjekësore. Brukseli siguron që të jetë në përputhje me rregullat e Organizatës Botërore të Tregtisë (OBT).

“Pasi Komisioni ka investuar shumë për të ndihmuar laboratorët për të zhvilluar vaksinat dhe për të rritur kapacitetet e tyre, ky kontroll është diçka që u detyrohemi qytetarëve (…) ndaj taksapaguesve”, nënvizoi një zyrtar.

Njoftimi, megjithatë, vjen në një kohë tensionesh mes BE-së dhe laboratorit suedez-britanik AstraZeneca, i cili ka njoftuar uljen drastike të dërgesave të vaksinave për 27 vendet e BE-së për shkak të një problemi “rendimenti” në një qendër europiane prodhimi.

commentFirst article
Sot mund të lexoni Shfletoni kopertinat