Zvicra nga sot i ka ashpërsuar rregullat anti-COVID.
Sipas rregullave të reja të gjithë ata që ia mësyen këtij shteti me aeroplan duhet të paraqesin një test negativ i cili nuk duhet të jetë më i vjetër se 72 orë.
Nga detyrimi përjashtohen fëmijët nën moshën dymbëdhjetë vjeçare.
Ndryshimi tjetër është se koha e karantinës mund të shkurtohet nga dhjetë në shtatë ditë.
Siç është paralajmëruar tashmë, detyrimit të karantinës i nënshtrohen ata që vijnë nga vendet të cilat Zvicra i ka vendosur në listën e vendeve me rrezik.
Ndërsa detyrimi i testit negativ vlen për të gjithë, kurse ata që vijnë në rrugën tokësore, detyrohen të tregojnë testin negativ vetëm nëse kanë ardhur nga vendet që janë në listën e rrezikut.
Sipas mediave zvicerane përveç kësaj, tani e tutje të dhënat e pothuajse të gjithë njerëzve që hyjnë në Zvicër do të regjistrohen sistematikisht, pavarësisht nëse ata arrijnë me aeroplan, anije, autobus apo tren.
Nga detyrimi i regjistrimit përjashtohen vetëm njerëzit nga zonat kufitare që udhëtojnë rrugës tokësore (përveç me tren).
Mediat raportojnë se karantina dhjetë ditore nga kontakti i fundit me një person të infektuar ose kur hyni nga një zonë rreziku mund të shkurtohet.
Sipas rregullave të reja parakusht për këtë është që personi në fjalë të mund të testohet pas shtatë ditësh dhe rezultati të dalë negativ.
Kërkohet gjithashtu miratimi nga autoriteti përgjegjës i kantonit.
Kostoja e testimit duhet të përballohet nga personi.
Karantinimi nga dita e nesërme vlen edhe për fëmijët.
