Liderët e 27 vendeve anëtare të Bashkimit Europian duan të nënshkruajnë një strategji të re të përbashkët për mbrojtjen në fillim të vitit të ardhshëm, pjesë e një shtytjeje për të përmirësuar bashkëpunimin e sigurisë, tha sot presidenti i Këshillit Europian, Charles Michel.
“Ne duam të rrisim investimet në mbrojtje, aftësitë civile dhe ushtarake, si edhe gatishmërinë operacionale”, tha Michel për shtypin pas videokonferencës së udhëheqësve, raporton ATSh.
Në vitet e fundit, BE është përpjekur të koordinohet më ngushtë për çështjet e sigurisë.
Qëllimi kryesor është një autonomi më e madhe strategjike, duke lejuar Europën të projektojë interesat dhe vlerat e saj në një skenë botërore, ku Shtetet e Bashkuara duket se po tërhiqen, ndërsa Kina dhe Rusia po bëhen më këmbëngulëse.
