Turqia konfirmon efikasitetin e lartë të vaksinës kineze

Evropë

Turqia konfirmon efikasitetin e lartë të vaksinës kineze

Më: 11 maj 2021 Në ora: 10:11
Foto ilustrim

Lajme të mira vijnë nga Turqia sa i takon efikasitetit të vaksinës kineze. Studimet e fundit kanë treguar se CoronaVac ka një normë efikasiteti prej 83,5% bazuar në studimet e fazës së tretë.

E diela që sapo kaloi ishte një nga ditët më të ngarkuara në një spital COVID të Stambollit, me qindra njerëz që prisnin në dhomat e vaksinimit dhe të tjerë në pritje të caktimit të një takimi për vaksinim, sipas faqes së internetit xinhuanet.com

”Spitali i urgjencës ”Feriha Oz”, i ndërtuar vitin e kaluar dhe me një kapacitet prej 1 008 shtretërish, në pjesën aziatike të qytetit, nuk ka parë kurrë një turmë të tillë që kur filloi fushata e vaksinimit në të gjithë vendin në janar”, sipas Mehtap Karaca Demiray, një infermiere e ngarkuar me operacionin e vaksinimit të popullatës.

“Kemi më shumë se 1 400 takime sot. Filluam në 08:30 dhe do të përfundojmë në mesnatë”, theksoi ajo.

Turqia filloi fushatën e saj me vaksinën kineze Sinovac më 14 janar, me përparësi për punëtorët shëndetësorë dhe të moshuarit.

Deri në fillim të prillit, vendi përdori ekskluzivisht vaksinat e kompanisë Sinovac CoronaVac.

Ai më vonë përfshiu vaksinën Pfizer-BioNTech në program dhe do të shtojë edhe rusen Sputnik V në ditët në vijim.

Njëzet e pesë milionë vaksina janë administruar në vend deri më tani.

Mjekët turq bien dakord që ata tani kanë mjaft të dhëna në terren për të rishikuar më saktësisht efektivitetin e CoronaVac.

“Bazuar në vëzhgimet tona në terren, mund të themi se vaksina Sinovac parandalon vdekjet dhe pranimin në spitale me 100%”, tha Nurettin Yiyit, një ndër mjekët kryesorë të spitalit, duke iu referuar situatës së përgjithshme në vend.

“Studimet kanë provuar efektivitetin e saj, por shënimet tona në terren janë edhe më të mira”, vazhdoi ai ndërsa inspektonte vaksinimin.

Duke folur për situatën në dy spitalet e tij, ai tha se rreth 4 000 punonjës të kujdesit shëndetësor morën dozën e dytë në shkurt.

Që nga ajo kohë, vetëm 60 raste të COVID-19 janë raportuar mes tyre, pa shtrime në spital dhe vdekje.

Mbrojtja nga vaksina u bë më e dukshme gjatë pikut të tretë të pandemisë, i cili filloi në mars.

Numri i infeksioneve ditore tejkaloi nivelin 60 000 në të gjithë vendin dhe qeverisë iu desh të deklarojë një bllokim total deri në 17 maj për të frenuar rritjen e rasteve.

Yiyit vuri në dukje se Turqia ka hyrë në valën e re të COVID-19 pasi vaksinoi më shumë se 85% të punonjësve të kujdesit shëndetësor dhe atyre të moshës 65 vjeç e lart me vaksinën Sinovac.

Guner Sonmez, një mjek i njohur radiolog, deklaroi se ”para vaksinimeve, disa punonjës shëndetësorë vdisnin çdo ditë nga koronavirusi, por pasi u vaksinuan, këto vdekje ndaluan”.

Universiteti ”Hacettepe” me qendër në Ankara më parë njoftoi se CoronaVac ka një normë efikasiteti prej 83,5% bazuar në studimet e fazës së tretë.

commentFirst article
Sot mund të lexoni Shfletoni kopertinat