Qindra emigrantë të padokumentuar në Bruksel kanë përfunduar një grevë urie pas 60 ditësh, duke hequr dorë nga kërkesa për një rregullim të statusit të tyre.
Një përfaqësues për grupin njoftoi se njerëzit e vendosur në Kishën e Shën Gjon Pagëzorit në Béguinage në Brukselin qendror po i jepnin fund refuzimit të tyre për të ngrënë ose pirë. Njerëzit jashtë kishës, të cilët ishin mbledhur në solidaritet me grevistët e urisë, e duartrokitën njoftimin. Sipas OJQ-ve të përfshira, gjithsej 476 njerëz ishin në grevë urie.
Grevistët e urisë u dërguan menjëherë në spital, disa prej të cilëve qëndruan në kujdes intensiv. Pasi të rikuperohen, ata mund të lëvizin në një zonë neutrale për të bërë kërkesa individuale për një leje qëndrimi. Qeveria kishte refuzuar një amnisti kolektive, duke thënë se rregullat aktuale ishin të drejta dhe njerëzore.
Duke folur me transmetuesin publik frankofon të Belgjikës, Sekretari i Shtetit për Migracionin, Sammy Mahdi është shprehur se “procedura jonë është e drejtë, korrekte dhe humane”. Kryeministri i Belgjikës, Alexander De Croo , e mirëpriti vendimin, duke deklaruar se një qeveri nuk mund të pranojë kurrë shantazhe.
Rreth 150,000 emigrantë të padokumentuar jetojnë në Belgjikë, përfshirë disa që janë vendosur për vite me radhë. Shumë kanë frikë se një përpjekje për të rregulluar statusin e tyre do të rezultojë në një urdhër për t’u larguar.
