BE do të ndihmojë Ballkanin Perëndimor

Evropë

BE do të ndihmojë Ballkanin Perëndimor

Më: 1 gusht 2021 Në ora: 07:23
Nicolas Schmit

Ministrat e Punësimit dhe Çështjeve Sociale të BE-së, së bashku me homologët e tyre nga Ballkani Perëndimor, u takuan në Slloveni për të zhvilluar bisedime mbi masat për përfshirjen e më shumë të rinjve në tregun e punës, ku disa zyrtarë rajonalë kërkuan edhe zbatimin e një skeme për garantimin e punës për të rinjtë, shkruan Mateja Benec për Euractiv.

“Besoj se punësimi është një faktor kyç që u mundëson të rinjve të jenë të pavarur. Të rinjtë janë një grup delikat në tregun e punës, veçanërisht për shkak të mungesës së përvojës në punë”, tha ministri i Punës slloven, Janez Cigler Kralj, pas takimit në Brdo pri Kranju, të enjten më 8 korrik.

“Është thelbësore që t’i mbështesim të rinjtë në përfshirjen në tregun e punës në BE dhe në Ballkanin Perëndimor”, shtoi ministri. Ai theksoi se programet më të suksesshme janë ato që u lejojnë të rinjve të marrin përvojë praktike, ndërkohë që mbështesin edhe punëdhënësit në punësimin e të rinjve. “Ne të gjithë duhet të sigurojmë të drejtat e të rinjve për arsimim, praktikë, ose një ofertë pune, brenda katër muajve që nga dita kur ata mbeten të papunë ose përfundojnë arsimin”, tha Cigler Kralj.

Pjesëmarrës të tjerë prezantuan masat e vendeve të tyre për të promovuar punësimin e të rinjve dhe për t’u mundësuar atyre një punë cilësore. Ata gjithashtu shkëmbyen mendime mbi sfidat strukturore me të cilat përballen të rinjtë në tregun e punës, veçanërisht si pjesë e tranzicionit të gjelbër dhe dixhital.

Ministrat ranë dakord se skemat e garantimit të punës për të rinjtë duhen zhvilluar dhe forcuar më tej. Sipas Cigler Kralj, partnerët nga Ballkani Perëndimor janë të gatshëm për krijimin gradual, zbatimin dhe zhvillimin e skemave të tilla. Ai tha se ishte gjithashtu i lumtur që ministrat dhe përfaqësuesit nga vendet e Ballkanit Perëndimor konfirmuan angazhimin për bashkëpunim të mëtejshëm të ngushtë në këtë fushë dhe përpjekjet për të parandaluar papunësinë te të rinjtë.

Komisioneri Europian për Punë dhe të Drejta Sociale, Nicolas Schmit, theksoi se të rinjtë nga Ballkani Perëndimor ishin pjesë e të rinjve europianë, kështu që atyre u duhej dhënë shpresë dhe zgjidhje konkrete për një të ardhme më të mirë. Ai e konsideron skemën e garantimit të punësimit si një angazhim të fortë dhe të qartë se të rinjtë kanë një pikë mbështetëse dhe mund të gjejnë zgjidhje, duke shtuar se është thelbësore që Ballkani Perëndimor të zhvillojë politika ekonomike që do të mundësojnë krijimin e vendeve të reja të punës.

Një pikë tjetër e rëndësishme janë aftësitë dhe njohuritë teknike, veçanërisht në epokën e dixhitalizimit, tha ai. Takimi në Brdo pri Kranju, ishte takimi i dytë i ministrave të Punësimit dhe Çështjeve Sociale të BE-së dhe homologëve të tyre nga Ballkani Perëndimor. Ai u mbajt si pjesë e një takimi jozyrtar dyditor të ministrave të Punësimit dhe Çështjeve Sociale të BE-së, si pjesë e Presidencës së Sllovenisë në BE.

Shfaq komentet
comments powered by Disqus
Sot mund të lexoni Shfletoni kopertinat