Vatikani, ndryshon radikalisht qëndrim në lidhje me dënimin me vdekje. Papa Francesku ka ndryshuar mësimet e besimit katolik për të kundërshtuar dënimin me vdekje në çdo rrethanë ndërkohë që katekizmi i kishës, që përmbledh të gjitha këto mësime, më herët nënvizonte se ai mund të përdorej në disa raste.
Tani, në mësimet e kishës thuhet, “është i papranueshëm pasi përbën një sulm mbi paprekshmërinë dhe dinjitetin e personit”. Në fakt edhe në të kaluarën Papa Françesku kishte folur kundër ekzekutimeve.
Tetorin e kaluar ai tha se politika e kishës mbi dënimin me vdekje ishte një fushë ku mësimet e saj nuk janë statike dhe mund të ndryshojnë në përputhje me shqetësimet moderne.
Teksti i katekizmit, fillimisht u ndryshua nga Papa Gjon Pali II në tetor 1992.
Më herët, në mësime thuhej se dënimi me vdekje ishte një mjet i pranueshëm, edhe pse ekstrem, i mbrojtjes së të mirës së përbashkët. Sidoqoftë, teksti i ri nënvizon se ka një rritje të ndërgjegjësimit se “dinjiteti i një personi nuk mund të humbasë edhe pasi ata kryejnë krime shumë të rënda”.
“Kisha do të punojë tani për abrogimin e dënimit me vdekje në të gjithë botën”, thuhet në një deklaratë të selisë së shenjtë. Historikisht kisha nuk i është kundërvënë dënimit me vdekje, madje as në shekullin e 20.
Në 1952, Papa Piu i XII thoshte se dënimi me vdekje nuk ishte shkelje e të drejtës universale të jetës. Papa Gjon Pali II, preferonte burgosjen në vend të ekzekutimit, atje ku ishte e mundur, ndërsa Papa Benedikti, shkruante se dënimi me vdekje mund të ishte i lejuar.
